iklan

POLÍTIKA

Janeiru-Marsu: MOP ezekuta OJE 2024 foin atinje 3%

Janeiru-Marsu: MOP ezekuta OJE 2024 foin atinje 3%

Osan Dolar Amérika. Imajen/Espesiál

DILI, 21 marsu 2024 (TATOLI)—Ministru Obra Públika (MOP), Samuel Marçal, hateten iha trimestre dahuluk (janeiru-marsu) ne’e MOP ezekuta Orsamentu Jerál Estadu (OJE) 2024 ne’e foin atinje 3%.

“Ezekusaun OJE 2024 ba Ministériu Obra Públika (MOP) hahu lao ona to’o pursentu tolu,” Ministru Obra Públika (MOP), Samuel Marçal, hateten ba jornalista sira iha Parlamentu Nasionál (PN), kinta ne’e.

Governante ne’e la esplika detallu ezekusaun pursentu tolu ne’e nia ekivalente ba orsamentu hira no ezekuta ba programa saida-saida de’it.

Aleinde ne’e, nia la esplika detallu projetu infraestrutura sira hanesan estrada, ponte no seluk tan  atu hala’o iha tinan ne’e, maibé ko’alia liu hodi haree ho mudansa klimátika ne’ebé agora akontese ne’e sei fó prioridade liu ba emerjénsia iha fatin ameasadu liuliu ba barajen, moru protesaun bele proteje komunidade nia hela fatin, natar no estrada.

Enkuantu Orsamentu Jerál Estadu (OJE) 2024 ba Ministériu Obra Públika (MOP) ne’e prevee $224.279.372, hodi aloka ba saláriu vensimentu $9.187.551, bens no serbisu $21.802.827, transferénsia públika $155.000.000, kapitál menór $198.400 no kapitál dezenvolvimentu hamutuk $38.090.594.

Hosi orsamentu ne’e aloka ba programa estrada no ponte $51.515.032, programa dezevolvimentu rurál no urbanu $2.804.340, programa funsionamentu no dezenvolvimentu instituisionál $13.611.520, programa agua no saneamentu $6.588.680, programa eletrisidade $149.118.800, programa laboratóriu no infraestrutura $641.000.

Tuir dokumentu livru proposta-lei OJE 2024 planu asaun anual ba MOP tau prioridade ba programa neen (6) mak hanesan programa estrada no ponte ho ninia sub-programa infraestrutura estrada, ponte no kontrolu cheias ho atividade 12, sub-programa investe iha planeamentu, atualizasaun, manutensaun no regulamentasaun rede rodoviáriu ho atividade rua.

Programa dezenvolvimentu rurál no urbanu ho ninia sub-programa estabelese no aplika kontrola konstrusaun ho atividade tolu, sub-programa dezenvolve polítika planeamentu urbanu ho atividade tolu, sub-programa melora abitasaun nasionál ho atividade haat.

Progama funsionamentu no dezenvolvimentu instituisionál ho sub-programa rua no nia ativade hamutuk 15.

Programa água no saneamentu ho nia sub-progama dezenvolvimentu no manutensaun sistema abastesimentu bee iha área rurál no urbanu ho atividade mak rua (2), sub-programa jestaun saneamentu ho atividade rua (2), sub-programa regulasaun jestaun ba rekursu hídriku no abastesimentu bee iha área rurál no urbanu ho nia atividade neen (6).

Programa eletrisidade ho nia sub-programa apoiu destinadu peskiza no regulasaun atividade elétrika ho atividade tolu, sub-programa enérjia elétrika oras 24 ho atividade ida.

Programa laboratóriu infraestrutura ho sub-programa dezenvolve apoiu norma téknika no teste ba konstrusaun no enjenária sívil ho atividade haat, sub-programa kontrola kualidade konstrusaun sívil no obra públika.

Entertantu, tuir dadus hosi Portál Transparánsia ne’ebé Agência Tatoli asesu iha loron 14 fulan-marsu 2024 haktuir katak, orsamentál hatudu orsamentu orijen ba tinan fiskál 2024 mak $2,237,618,655.00, ne’ebé ho kompromisu $74,343,534.61, obrigasaun $16,177,212.44, ho  atuál $129,699,136.98, balansu $2,049,753,195.85, ne’ebé koresponde ho 5.1%.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!