DILI, 22 Marsu 2024 (TATOLI) – Ministériu Agrikultura, Pekuária, Peska no Floresta (MAPPF) sei reativa sentru formasaun téknika agríkola iha Kurluli-Maliana no Natarbora-Manatuto hodi forma joven sira iha área agrikultura.
Diretór Nasionál Estensaun no Formasaun Agríkola, Januário Marçal, informa katak objetivu atu hahú fali formasaun ba joven sira iha sentru rua ne’e mak tulun sira ne’ebé akaba ona sira-nia estudu iha eskola tékniku-vokasionál agrikultura, inklui sira ne’ebé remata ona iha universidade no sira ne’ebé hakarak bá serbisu iha área agrikultura nian hodi prepara di’ak liután, nune’e iha ona koñesimentu adekuadu hodi kompete iha merkadu rai-laran no li’ur.
“Sentru rua ne’e sei reativa hikas iha tinan ne’e no sentru Kurluli Maliana mak reativa iha Juñu ho sesaun klase fulan haat to’o fulan neen, depois maka kontinua tan formasaun iha área téknika agríkola ba sentru formasaun Natarbora [iha jullu], nune’e bele prepara joven sira hodi hetan koñesimentu iha área refere”, Januário Marçal hatete ba Tatoli iha Comoro.
Dirijente ne’e informa katak bainhira sentru rua ne’e reativa ona maka, iha 2025, sei instala tan modelu hanesan iha Fuiloro-Lautém no Rejiaun Administrativa Espesiál Oé-Cusse Ambeno.
Tuir nia, sentru formasaun téknika agríkola Kurluli no Natarbora dezde nia ezisténsia iha 2020 forma ona joven hamutuk 240. Ba tinan ida ne’e, MAPPF sei foka ba sentru Maliana hodi fó oportunidade ba joven 30 hodi partisipa formasaun durante fulan haat to’o neen nia laran.
Ministeriu Agrikultura sei halo mós koordenasaun ho Sekretaria Estadu Formasaun Profisionál no Empregu (SEFOPE) bainhira formasaun ne’e realiza ona formandu sira bele hetan mós sertifikadu, nune’e bele ajuda sira ne’ebé hakarak bá serbisu iha rai-li’ur.
“Ita harak joven sira ne’ebé ita prodús ba tinan ida ne’e pelu menus tenke iha abilidade, depois hetan mós sertifikadu ida husi SEFOPE, nune’e bele tulun sira bainhira bá buka serbisu iha rai- li’ur ka laran”, reitera.
Jornalista: Tomé Amado
Editora: Maria Auxiliadora
