HEADLINE, SAÚDE

Timoroan ida mate ho virus Rabies iha HNGV

Timoroan ida mate ho virus Rabies iha HNGV

Ilustrasaun asu tata ema habiban infesaun virus Rabies ne´ebé halo ema ida bele mate. Imajen/Espesiál

DILI, 23 marsu 2024 (TATOLI)—Timoroan ida ho naran Veronica dos Santos, idade 19, husi aldeia Naetuna, suku Abani, postu Administrativu Passabe, Rejiaun Administrativa Espesiál Oé-Cusse Ambeno (RAEOA) mate ho pozitivu Rabies (Raiva). iha Hospitál Nasionál Guido Valadares (HNGV).

“Ha’u-nia alin mat iha HNGV horisehik lokraik tuku 15h00. Nia mate ho pozitivu Rabies ka asu tata,” Familia matebian, Reno Fernandes, hateten ba jornalista sira iha mortuáriu HNGV, sábadu ne´e.

Kronolojia hosi matebian enfrenta ne’e iha 26 dezembru 2023, matebian asu tata iha Oé-Cusse, entaun iha momentu ne’eba asu tata maibé familia seidauk deskobre katak asu tata ne’e veneno ida.

“Momentu ne’eba ami hanesan familia sei menus informasaun kona-ba asu tata transmite virus ne’e ba ema, entaun iha tempu ne’eba matebian ne’e asu tata nia liman loos iha meudia no ba aban asu ne’e mós mate fatin. Depois ami familia sira mós laiha informasaun ida kona-ba atu vasina asu hodi prevene virus Rabies ne’e rasik. Entaun, familia hotu-hotu fó hatene ba matebian atu lori ba fasilidade saúde atu halo tratamentu maibé matebian hatan katak husik ba karik ida ne’e ha’u-nia destinu atu mate la problema. Ho razaun ida-ne’e, familia labele obriga tanba ninia dezisaun rasik,” nia esplika.

Nia haktuir, depois asu tata matebian  ne’e  laiha sintoma ruma  atu mosu entaun husi dezembru 2023 ne’e to’o 19  marsu 2024 mak foin sente isin-manas bee-doko, kotuk moras no kakorok moras.

“Ho ida-ne’e familia konsege lori matebian ba Hospitál RAOEA iha tersa 19 to’o kinta 21 marsu hodi simu asisténsia husi mediku sira. Maibé, iha momentu ne’e profisionál saúde halo kedas evakuasaun hosi RAEOA mai Hospitál Nasionál Guido Valadares maibé to’o iha ne’e mateban isin-manas aumenta maka’as, to’o sesta horisehik lorokraik matebian iis kotu no daudaun ne’e sei iha hela mortuáriu HNGV,” nia informa.

Daudaun ne’e  familia sira organiza malu oinsá atu halo transportasaun mate-isin ba nia moris fatin RAEOA hodi halo prosesu funebre.

“Ami agora konkorda malu ona katak aban dadeer mak lori matebian ba nia moris fatin hodi halo prosesu funebre liuhosi dalan terrestre nian,” nia dehan.

Nune’e, nia husu ba Governu tenke vasina asu iha area fronteira nune’e evita transmite moras Rabies ne’e ba ema ida bainhira asu tata.

Diretór Jeral Servisu Korpurativu iha Ministériu Saúde (MS), Marcelo Amaral, relata pasiente pozitivu ne’e asu tata iha dezembru 2023 no hatudu sintoma iha inisiu fulan ida-ne’e.

“Pasiente ne’e hetan asu tata ne’ebé rezulta kanek iha liman loos iha dezembru 2023. Iha mós informasaun katak asu ne’ebe tata pasiente hatudu hahalok agresivu tebes no mate rasik loron tuir mai,” Diretór Jeral Marcelo Amaral hatete liuhosi konferensia imprensa, iha salaun Palasiu da Sinzas, Caicoli, sesta ne´e.

Diretór Jeral ne’e esplika, iha loron 21 marsu  profisionál saúde sira transfere diretamente ba iha HNGV ho aviaun MAF.

“Moras Rabies ne’e liuhosi  asu  tata  tanba ne’e mak presiza iha vijilánsia makaas iha área fronteira no hadook aan husi asu,” nia dehan.

Pasiente referidu halo ezame médiku iha sentru saúde iha loron 20 fulan-marsu 2024 aprezenta sintoma hanesan isin manas, malirin, muta, kakorok moras, kotuk laran moras, iha difikuldade tolan hahan, hidrofobia totál atu hemu bee, tauk naroman, liman ain istika hotu no kanuruk toos.

Nia dehan, Ministériu Agrikultura no Peska (MAP) halo ona vasina ba munisípiu sira hanesan Bobonaro, Covalima no RAEOA ne’ebé atinje ona 70%.

“Moras Rabies perigu tebes no laiha kura, se observa asu ne’ebé iha hadook aan atu evita tata. Se ema ruma asu tata, tenke kontaktu diretamente ba profisionál saúde ka sentru saúde besik atu hetan vasina ba Rabies,” nia hateten.

MS sei halo esforsu ida halo kampaña hodi hasa’e koñesimentu ba komunidade no halo medida  preventiva ba populasaun.

Prezidente Insitutu Nasionál Saúde Públika Timor-Leste (INSP-TL), Merita Monteiro, pasiente 15 ne’e na’in 12 hetan ona vasina Rabies.

“Sira agora ne’e iha kondisaun di’ak, maibé tempu inkubasaun entre semana rua to’o tinan ida, tanba depende ba sistema imunidade pasiente,” Merita Monteiro esplika.

HNGV iha ekipamentu teste PCR atu afirma loloos kazu Rabies, maibé presiza iha mós hemoglobina ba Rabies tanba ne’e presiza apoiu parseiru sira tanba HNGV laiha.

Tékniku hosi MAP, Joanita Jong, hateten moras Rabies ne’e importadu husi nasaun viziñu Indonézia no bele transmite husi asu ida ba asu seluk.
“Ami foti amostra husi asu rua hodi halo teste, ita deteta no hetan mia rezultadu katak pozitivu ba Raiva ka Rabies, tanba Governu Austrália fó ona tratamentu. Asu rua ne’e hosi Pasabe RAEOA nian. Ami kontinua foti amostra,” nia hateten.
Nia esplika, asu ne’ebé hetan moras Rabies mak hanesan kaben barak, si’ak, tauk bee no naroman no fatin nakukun hodi subar.

 Moras Rabies 

Rabies nu udar infesaun virus ba kakutak no sistem saraf. Virus Rabies ne´e jeralmente hada´et ba ema liuhosi animál sira tata ema. Bainhira la kura lalais mak Ravies bele oho ema.

Kauza hosi Rabies

Animal prinsipál ne´ebé sai hanesan transmisor mak asu. Aleinde asu, animál seluk ne ebe lori trasmite virus Rabies ba ema ne´e mak Niki, busa no Makaku. Virus Rabies ne´e transmite liuhosi sira-nia kabeen, tata ema ka hosi rakut ema ne ebé aftea ba moras Rabies. Animál me´ebé transmite virus Rabies ne´e jerálmente animál fuik no animál haki´ak sira-ne’ebé nunka hetan vasinasaun kona-ba Ravies nian ne´e.

Sintoma Rabies

Sintoma Rabies ne´e mosu ho variasaun oioin, entre loron lima to´o tinan ida. Maibé, sintoma moras Rabies ne´e jeralmente mosu iha loron 30 to o loron 90 hafoin ema-ne´ebé hetan moras ne´e antes ne´e asu tata, ne´ebé hetan infeksaun ona. Sintoma Rabies bele mosu lalais bainhira asu tata fatin ne´e besik liu kakutak, ezemplu hanesan asu tata iha hirus matan, iha kakorok ka asu tata iha ulun.

Sintoma Rabies ne´ebe sente iha inisiu ne´e mak hanesan isin-manas bee-doko, liman-ain sin, ulun moras, kolen lalais no laiha gostu atu han.

Komplikasaun Rabies

Rabies nu´udar moras ida-ne´ebé perigu liu. Bainhira mosu ona sitoma ne´e signifika virus Rabies ne´e tama ona kakutak no kakutak hetann infesaun ona, entaun pasiente nia kondisaun isinnne´e tuun lalais de´it. Ninia impaktu mak ema ne’ebé hetan moras ne´e sei hetan kompikasaun oioin hanesan iis laiha, agunia, fuan la book ann no mate.

Jornalista : Felicidade Ximenes

Editór       : Cancio Ximenes

iklan
iklan

Leave a Reply

iklan
error: Content is protected !!