BOBONARO, 26 marsu 2024 (TATOLI) – Autoridade Munisipál Bobonaro, tersa ne’e halo enkontru ho diretór kompañia lokál sira hamutuk 57 ne’ebé prepara atu submete dokumentu hodi konkorre iha projetu Planu Dezenvolvimentu Integradu Munisipál (PDIM) hamutuk 13 iha tinan 2024.
Projetu 13 ne’e kompostu hosi konstrusaun irrigasaun Raegeren-Rabuanan kilómetru 3 ho kustu estimativu $110,000.00, konstrusaun edifísiu Servisu Agrikultura Munisípiu Bobonaro ho kustu estimativa $250,000.00, konstrusaun edifísiu Servisu Munisipál Água, Saneamentu no Ambiente (SMASA) ho kustu estimativa $120,000.00.
Reabilitasaun edifísiu pouzada iha pemancar, ne’ebe lokaliza iha aldeia Aculaka-Lahomea ho kustu estimativa $250,000.00, kontinuasaun konstrusaun merkadu Mau-Mali ho kustu estimativa $200,000.00, konstrusaun barrajen iha mota Maumela I no II iha Cailaco ho kustu estimative $250,287.00.
Konstrusaun merkadu Marco-Cailaco ho kustu estimativa $90,000.00, konstrusaun postu saúde no rezidénsia pesoál saúde iha suku Molop ho kustu estimativa $218,000.00, reabilitasaun estrada Aiasa, Mazop no Holsa-Taz ho kustu estimativa $270,000.00, konstrusaun bee-moos sistema gravitasaun Tasmil, suku Lontas ho kustu estimativa $200,000.00.
Nune’e mos konstrusaun bee-moos iha Oelaca no Deudet-Loloto’e, konstrusaun sala tolu iha Eskola Dom Samara-Balibo ho kustu $115,000.00, konstrusaun barrajen mota Bauriko iha Ensinu Báziku Sentrál (EBC, sigla portugués) Koelima ho kustu $200,000.00.
Iha intervensaun, Prezidente Autoridade Munisipál Bobonaro, Alexandrino Pires, husu ba diretór kompañia lokál sira-ne’ebé ba oin sai vensedór iha projetu PDIM atu implementa obra ne’e ho responsabilidade, kualidade no finaliza tuir kontratu ne’ebé iha.
Nia apela razaun ne’e tanba projetu barak iha munisípiu Bobonaro abandona hela.
“Iha projetu ne’ebé abandona prezudika movimentu hotu-hotu la la’o, ne’ebé ita mesak Bobonaro-oan de’it, ita-nia objetivu halo projetu maka atu fasilita no akomoda ema-nia nesesidade, ne’e duni servisu ho fuan atu fó kontribuisaun ba dezenvolvimentu,” nia hateten iha salaun administrasaun munisipál Bobonaro.
Enkuantu tuir lei, projetu PDIM implementa ho durasaum fulan-lima no retensaun fulan-tolu no tuir dekretu lei númeru 15/2016,8 juñu, sita katak empreza ne’ebé abandona projetu sei aplika sansaun ho blokeia tinan-tolu to’o tinan-lima.
Nune’e mós dekretu lei númeru 22/2022, 11 maiu, iha artigu 156 hateten, sei aplika koima 0,05% bainhira empreza la hala’o servisu ho di’ak.
Atu atinje ida-ne’e, nia dehan, iha loron 27 marsu sei akompaña ekipa tékniku sira halo vizita ba lokál projetu sira no kompromete sei kontinua halo supervizaun ba projetu hirak-ne’e atubele garante finaliza tuir tempu.
“Sé mak manánn projetu ne’e ha’u asina de’it, la haree partidu A ou B, maibé sé mak serbisu halimar, dasa dasa liu de’it, la kualidade. Ne’e ha’u sobu, depois ha’u sei la extende tán kontratu ba dala rua ka tolu, iha ha’u-nia mandatu extende dala ida de’it, tanba projetu barak mak ita extende beibeik, kompañia sira servisu halimar fali,” nia fó hanoin ba responsável kompañia lokál sira.
Diretor Kompañia Hugo Amor Unipesoál Lda, Domingos Gouveia, hateten bainhira manán projetu, nia parte prontu servisu tuir lei no regra ne’ebé hatuur ona.
“Se ha’u manan karik, ha’u prontu kumpre saida mak Prezidente Autoridade Munisipál Bobonaro dehan ne’e. Ha’u aseitu ida-ne’e, laiha rezerva, tanba ho ida-ne’e mak emprezariu lokál sira bele servisu ho responsabilidade,” nia hateten.
Enkuantu tinan fiskál 2024 ne’e, Autoridade Munisipál Bobonaro hetan alokasaun orsamentu hamutuk $9,270,244.00, hosi montante ne’e fahe ba kapitál dezembolvimentu hamutuk $2,518,287.00.
Notísia relevante: Hadi’a Infraestrutura Bázika Kontinua Sai Prioridade ba Bobonaro iha 2020
Jornalista: Sérgio da Cruz
Editór: Evaristo Soares Martins
