Ministru Defeza ensera kursu

DILI, 26 marsu 2024 (TATOLI) – Ministru Defeza Kontra Almirante Donanciano Costa Gomes Pedro Klamar Fuik, halo enseramentu ba kursu tolu ne’ebé halo hosi Institutu Defeza Nasionál (IDN), kursu ne’e dezde 2023.

Kursu hirak ne’e mak Promosaun Ofisiál Superiór, Kursu Post Estadu Estratéjiku no Kursu Post Graduasaun Estadu Mar. Kursu sira-ne’e realiza durante tinan ida nia laran iha edifísiu IDN, Palásiu Governu..

Kursu Promosaun Ofisiál Superiór kompostu hosi ema 17, membru PNTL ne’ebé partisipa iha kursu ne’e ho deviza Inspetór na’in 10, mane hitu feto nain tolu no membru F-FDTL ne’ebé partisipa iha kursu ne’e hamutuk ema na’in hitu, kompostu hosi deviza kapitaun rua, majór ida , no kapitaun tenente haat.

Kursu Post Graduasaun Estratéjika partisipa ho ema 30 no kursu ba Post Graduasaun Estadu Mar Estratéjiku iha ema 30. No kursu sira ne’e realiza tanba IDN parseria Fakuldade Direitu Katoliku Portu Portugal durante tinan ida nia laran.

Klamar Fuik, hateten enseramentu ba Kursu Promosaun Ofisiál Superiór ba daneen, kursu Post Graduasaun Estratéjika ba daneen no kursu dahuluk ba Post Graduasaun Estadu Mar Estratéjiku ne’ebé halo iha IDN durante tinan ida.

“Ohin ita ensera Kursu Promosaun Ofisiál Superiór ba daneen, kursu Post Graduasaun Estratéjika ba daneen no kursu dahuluk ba Post Graduasaun Estado Mar Estratéjiku no ita mós loke fali kursu ba Estadu Maiór Konjunta Integradu ba instituisaun F-FDTL no PNTL ba tinan letivu 2024 -2025 ho durasaun fulan sia no kursu ida-ne’e sei partisipa hosi membru PNTL ho postu Superintendente Asistente Polísia no Superintendente Polísia, enkuantu hosi membru F-FDTL ho postu Majór no Ofisiál Superiór hanesan Tenente Koronél”, Klamar Fuik hateten ba jornalista sira hafoin ensera kursu tolu ne’ebé hala’o iha Salaun Delta Nova, tersa, ohin.

Nia dehan, kursu dahuluk ba área seguransa no dezenvolvimentu nasionál sustentavél foin tama iha faze preparasaun no kursu ne’e sei hahú iha 2025.

Governante ne’e hateten, ezisténsia IDN, iha biban ne’e, IDN hatudu ona progresu balun liuhosi kapasitasaun hodi prodús rekursu kualifikadu.

“IDN sei kontinua esforsu sira ne’e ba futuru, atu valoriza rekursu timoroan liuliu ba kualifikasaun ba lider kualifikadu no profisionál”, nia adianta.

Iha fatin hanesan, Diretór Interinu Institutu Defeza Nasionál (IDN) Guilherme Soares, akresenta enseramentu ba kursu hirak ne’e, iha mós loke tan kursu foun.

“Ita mós loke fali kursu ba Estadu Maiór Konjunta Integradu ba instituisaun F-FDTL no PNTL no kursu ba Alta Komandu no kursu ida-ne’e sei partisipa hosi Ofisiál Superiór F-FDTL no PNTL hosi Ofisiál F-FDT ne’e ho postu Tenente Koronél, enkuantu hosi Ofisiál PNTL ne’e ho deviza Superintendente no Superintendente Xefe inklui kargu Xefia hosi Administrasaun Públika hanesan Diretór Nasionál no Diretór Jerál, inklui kursu mestradu iha jestaun marítima nian”, nia konklui.

Jornalista: Natalino Costa

Editór : Zezito Silva