DILI, 27 marsu 2024 (TATOLI) – Prezidente Repúblika, José Ramos Horta, husu ba membru Polísia Nasionál Timor-Leste (PNTL) atu serbí povo no Estadu hodi garante pás, estabilidade no resepita direitu umanu iha Timor-Leste.
Xefe Estadu hato’o asuntu ne’e bainhira partisipa serémonia aniversáriu Polísia Nasionál Timor-Leste (PNTL) ba dala-24 ho tema “Profissionál no Reziliente” ne’ebé realiza iha komandu Unidade Espesiál Polísia Bairru-Pité, tersa ne’e.
“Ha’u nia mensajen ikus ba PNTL buka atu serbí povu no Estadu. Oinsá atu serbí povu, serbí ho respeitu ba direitu umanu, respeita ba étika profesionál ne’ebé imi nian no ita hotu nian hodi garante pás no estabilidade,” dehan Xefe Estadu.
Atu garante pás no estabilidade, PR Horta husu ba Governu fó meiu di’ak liután ba PNTL atu iha responsabilidade hodi serbí povu no nasaun.
“PNTL hamutuk ho FALINTIL-Forsa Defeza Timor-Leste (F-FDTL) sai nu’udar instituisaun ida ne’ebé garante dame no seguransa, ho nune’e labele halo institusaun rua ne’e naran fo’er, tenke hatudu disiplina 100%,” Horta fó hanoin..
Alende ne’e, Komandante Supremu mós husu ba Governu atu promove no fó prioridade ba feto sira atu sai membru no asume kargu Xefia sira iha Polísia Nasionál Timor-Leste (PNTL).
“Ha’u hatete bebeik ita tenke mobiliza aan loke odamatan liután ba partisipasaun feto iha ita nia instituisaun PNTL no ba sosiedade. Feto tenke reprezenta 50% umanidade,” nia sujere.
Xefe Estadu dehan durante tinan 20-resin ona laiha evidénsia ida hatudu katak mane mak matenek liu feto. Tanba ne’e tenke dezenvolve feto no promove liután feto nia kareira.
Governu rekoñese PNTL iha difikuldade
Iha Biban hanesan, Ministru Interiór, Fransisco Guterres, rekoñese ezisténsia Polísia Nasionál Timor-Leste durante tinan 24, maibé iha difikuldade ba infrastrutura no rekursu umanu.
“Ita rekoñese sira eziste tinan 24 ona maibé kontinua hasoru difikuldade lubuk ida kona-ba infrastrutura, kona-ba rekursu umanu seidauk to’o ideál ka loloos, nune’e ita hakarak aumenta tan rekursu no hadi’a sira nia infraestrutura,” Governante ne’e afirma.
Governu mós iha kompromisu kontinua hadi’a problema infraestrutura ne’ebé instituisaun PNTL enfrenta atubele serbisu ho profissionál no garante pás no estabilidade iha Timor-Leste.
“Loos, kona-bá infrastrutura ita iha problema boot, fatin barak edifisiu PNTL nian laiha kondisaun ne’ebé ladi’ak, maibé Governu sei esforsu hodi rezolve,” na kompromete.
Tinan ne’e, nia promte governu konstroi hotu edifísiu PNTL hahú fronteira ba postu, Eskuadra, kuartél Munisipál no kuartél jerál.
“Ita tenke halo duni fatin dignu ba sira atu halo servisu ne’ebé di’ak liután. Orsamentu hira-hira ba infrastrutura nian ha’u labele ko’alia sai montante hira, tanba montante ne’e tun sa’e, ha’u ko’alia tia montante ida, bainhira realiza fali montante seluk ne’e hanoin la di’ak ne’ebé montante ha’u la ko’alia,” nia hatete.
Kona-ba problema ekipamentu, Governante ne’e dehan PNTL mós iha difikuldade ba ekipamentu ne’ebé barak avaria no balun ho durasaun kle’ur ona presiza troka.
“Sira iha mós problema ba ekipamentu, entaun Governu halo hela levantamentu dadus, atu nune’e ita bele hatene katak nesesidade PNTL nian iha ne’ebé mak presiza Governu tenke halo esforsu tau ba atu sira halo servisu ho di’ak,” nia relata.
Rekruta ajente PNTL
Governu mós planeia atu aumenta rekursu umanu liuhosi halo rekrutamentu membru PNTL foun hodi reforsa serbisu iha fronteira.
“Ita hakarak aumenta tan rekursu Umanu. Tanba ne’e mak tinan ida ne’e ita sei halo rekrutamentu,” Governante ne’e afirma.
Governu seidauk realiza rekrutamentu ba kadete foun tanba iha tinan ne’e, membru PNTL balun ne’ebé idade reforma sei sai, nune’e Governu sei estuda kle’an hafoin foti desizaun.
“Ita atu halo ona rekrutamentu, maibé iha tinan ne’e ita nia Polisia lubuk ida mak sei sai, ida-ne’e ba sira ne’ebé idade reformadu, entaun ami tenke estuda didi’ak atu halo balansu ba ida ne’e, nune’e ita rekruta halo númeru liu oituan hosi sira ne’ebé sai atubele atinje númeru ne’ebé ita hakarak,” refere Ministru.
Iha prosesu rekrutamentu, nia afirma Governu haree tuir jeografikamente kada Munisípiu tenke iha reprezentante, jerasaun patriota tenke iha reprezentante no ba sidadaun hirak ne’ebé intelektuál atu dezenvolve PNTL.
Kona-ba bainhira mak Governu halo rekrutamentu Ministru ne’e seidauk fó sai data loloos, maibé tinan 2024 sei iha duni rekrutamentu ba membru PNTL foun tanba orsamentu alokadu ona.
PNTL prontu garante pás no estabilidade
Entretantu, Komandante Jerál PNTL, Komisáriu Jerál Polísia Henrique da Costa, hateten PNTL nafatin reforsa pás iha seguransa interna no estabilidade iha Timor-Leste.
“Kada loron ami habelar instrusaun informasaun relativamente ho potensia fenomena krime ne’ebé la’o hela, PNTL kontinua halo servisu ne’ebé másimu atu serbí ba povu no nasaun,” Komisáriu PNTL ne’e promte.
Iha serimónia aniversariu ne’e nu’udar Komandante Jerál alerta ba membru hotu atu servisu di’ak liután maske hasoru dezafiu oioin.
“Durante tinan 24, imi (membru) halo ona imi nia misaun ne’ebé determinante tebes ba iha susesu hodi mantein seguransa interna, trankulidade públiku no ba kumprimentu ita nia misaun sira. Maske ita hasoru difikuldade ne’ebé grave hanesan krize 2006, ita hatudu forsa, koezaun, konfiansa no fó esperansa ba futuru ne’ebé seguru ba povu Timor-Leste,” nia agradese.
Komandante Jerál afirma segredu hosi susesu mak sempre ho profesionalizmu no reziliente. Profesionalizmu iha servisu ne’ebé membru hotu ezekuta. Reziliente iha esforsu atu servi de’it povu no nasaun.
“Rezeliensia ba mane ka feto PNTL ne’ebé konsege adapta mudansa dignifika farda ne’ebé ita utiliza kada loron ho orgullu. Profesionalizmu iha atuasaun sira sempre ho imparsialidade no apartidarizmu ba ema hotu. Reziliente hodi atende sidadaun hotu ho kapasidade hodi simu kritika konstrutivu ne’ebé permite hodi mellora servisu polisiál,” nia tenik.
Hanesan Komandante Jerál nia sei fó atensaun tomak ho komprimisiu atu kria kondisaun nesesariu ba melloramentu membru hotu nia servisu.
“Ita hotu hatene katak dalan ne’ebé ita atu la’o sei hasoru dezafiu, maibé ita hotu tenke haree ba futuru ho esperansa ne’ebé forte no enerjia. Kontinua sura mós ho imi, ho ida ne’e de’it, ita bele kontinua hodi bele afirma katak PNTL ohin loron sempre profesionál, reziliente ne’ebé hanesan ho nia lema servi no proteje,” konklui.
Jornalista: Hortencio Sanchez
Editór: Florencio Miranda Ximenes
