iklan

EKONOMIA, BAUCAU, HEADLINE, MUNISÍPIU

Ezekusaun OJE 2024, Baucau atinje 29.2%

Ezekusaun OJE 2024, Baucau atinje 29.2%

Sekretáriu Munisipál Asuntu Administrasaun no Finansa Baucau, Juvinal Daniel Filipe Belo. Imajen Agência TATOLI/Natalino Belo.

BAUCAU, 27 marsu 2024 (TATOLI) – Progresu ezekusaun trimestrál dahuluk Orsamentu Jerál Estadu (OJE) ba munisípiu Baucau tinan 2024 atinje ona pursentu 29.2 hosi totál orsamentu $9.456.741.00.

Sekretáriu Munisipál Asuntu Administrasaun no Finansa, Juvinal Daniel Filipe Belo, esplika, tuir regra ezekusaun orsamentu kada trimestrál presiza ezekuta 25% nune’e hato’o ona ba nasionál ho atinjimentu hamutuk 29%.

“Kategoria tolu mak ita ezekuta hanesan operasionál sira liuliu funsionamentu administrasaun, saláriu ba funsionáriu sira no transferénsia ba programa merenda eskolár inklui insentivu ba autoridade suku sira,” Sekretáriu Munisipál Asuntu Administrasaun no Finansas hateten iha Sentru Konvensaun Baucau (CCB, sigla portugés) Vila Antiga, kuarta ne’e.

Hosi ezekusaun trimestrál dahuluk fahe ba kategoria lima hanesan; saláriu no bensementu, bens (sasán) no servisu, transferénsia públika, kapitál menór no kapitál dezenvolvimentu sei iha faze aprovizionamentu tanba foin to’o iha selesaun dokumentu.

Alende ne’e, Autoridade Baucau sei halo pagamentu ba projeitu Planu Dezenvolvimentu Integradu Munisipál (PDIM) tinan-2023 ne’ebé reapropriasaun ba OJE 2024 hanesan konstrusaun edifísiu edukasaun, konstrusaun edifísiu lojístika no reabilitasaun edifísiu postu administrativu Baucau Vila ne’ebé iha ona faze finalizasaun.

“Iha nível nasionál Baucau hetan apresiasaun tanba bele atinje liuhosi pursentu 25,” Juvinal Belo akresenta.

Juvinal Belo, argumenta, iha trimestrál daruak mai sei kontinua ezekuta orsamentu tuir regra no meta ne’ebé hatuur ona ho konsisténsia nune’e bele tuir tarjeitu iha tinan 2024 nian.

Tuir dadus, totál orsamentu ba munisípiu Baucau tinan-2024 hamutuk $9.456.741.00 ne’ebé fahe ba kompromisu $38.156,50, obrigasaun $1.375.530,50, atuál $1.381.474,15 no saldu atuál hamutuk $6.661.579,85.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!