iklan

HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Lian-na’in Oé-Cusse oferta lilin hodi husu matak malirin ba Senhor de Morto

Lian-na’in Oé-Cusse oferta lilin hodi husu matak malirin ba Senhor de Morto

Lia-na'in Oé-Cusse mai hosi suku 18, oferta lilin no kabas husu matak malirin ba senhor de Morto. Imajen Tatoli/Abílio Elo Nini.

OÉ-CUSSE 27 marsu 2024 (TATOLI) – Lia-na’in mai hosi suku 18 iha Rejiaun Administrativa Espesiál Oé-Cusse Ambeno (RAEOA), kuarta ne’e, oferese oferta anuál hanesan lilin ho kabas ba Igreja Katólika, hodi husu matak malirin ba Nai Jesus ne’ebé misionáriu portugés hanaran Senhor de Morto ha Oé-Cusse Ambeno.

Lilin ho kabas ne’ebé lia-na’in sira oferese, hamutuk 300, ne’ebé reprezenta suku idak-idak iha territóriu Oé-Cusse, no mós oferese mina nú no bua malus.

Reprezentante lia-na’in suku 18, Zeferino da Crus Salu, hateten, objetivu hosi asaun ne’e nu’udar oferta anuál ho lian Baikenu katak, tuna-ton, hanesan lisan ida dezde avo sira hosi jerasaun ba jerasaun tutan agora, no sei la kotu.

“Objetivu aferta anuál ida-ne’e kada tinan, katak sarani Oé-Cusse, sira iha obrigasaun atu fó ita-nia oferta ba Nai Maromak, tanba durante ita servisu tinan ida, saida mak ita halo iha tinan ne’e, maka to’o nia tempu Páskua hanesan ne’e, ita-Nai Jesus oferese aan atu salva ita-nia sala, ita mós oferta ida-ne’e ba ba Igreja liuhosi Nai Senhor de Morto, atu fó matak malirin mai ita,” Zeferinobda Crus ko’alia iha ámbitu oferta ne’e.

Nia hatutan, lilin ho kabas inklui mina nú no bua malus oferta ba Igreja, nu’udar kontribuisaun hosi sarani sira iha suku 18, aliende hatama lilin ho kabas iha igreja, fahe mós parókia sira iha sub-rejiaun haat; Oésilo, Pássabe, Nítibe no Pante Makasar.

Lia-na’in sira la’o-ain hosi reinu liurai Costa, atu ba hatama lilin iha Igreja. Imajen Tatoli/Abílio Elo Nini.

Nune’e mós fahe ba kapela no santu-santa sira hotu, hanesan kapela santu Reliqui Citrana, Santu António, São Pedronno santu sira seluk-tán.

“Ohin ita halo oferta jerál ida ba igreja tuan liu iha Oé-Cusse, maka fatin ne’e, la’os lilin ho kabas de’it maibé mina nú, buah malus, ai-fuan, ne’e hatudu katak hatudu ba Nai, durante tinan ida ami servisu mak ida-ne’e, oferta direitamente ba Nai Senhor de Morto,” nia afirma.

Iha biban ne’e, Padre Pároku Numbei, Júlio do Carmo, agradese ba lia-na’in suku 18 iha Oé-Cusse, tanba oferta anuál ne’e nu’udar sinál domin ba Maromak atu hetan matak no malirin.

“Agrade wain ba katuas lia-na’in sira hosi suku 18, ita-bo’ot sira ohin aferta anuál ida-ne’e hasa’e ba uma-kreda agradese ba buat ne’ebé imi halo, maibé importante maka oferese nafatin ita-nia an ba Maromak Nai Senhor de Morto, ne’ebé hela iha fatin ne’e, kada tinan ita hotu hahi ba Nai Maromak, nune’e bele kbi’it matak malirin ba ita hodi hala’o atividade hotu durante tinan ida nia laran,” nia agradese.

Asaun ho buat ne’ebé ita halo oferese ba Nai Maromak, bele sai nu’udar grasa ida ne’ebé ita simu iha loron bo’ot paskua ninian, hodi hanoin hikas Jesus nia terus mate no moris hias.

“Lilin da-ne’e, nu’udar roman ida, Kristu moris hias ninian, roman ida-ne’e maka buka atu partilla ba malu, kria pás unidade dame ba ita-nia maun alin sira, iha suku no aldeia sira, atu roman kristu ida-ne’e bele lori buat foun mai ita nia moris loro-loron nian,” nia katak.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!