DILI, 27 Marsu 2024 (TATOLI)—Fundasaun Many Hands One Nation (MAHON) ne’ebé hanesan sentru treinamentu, fahe esperiénsia kona-ba implementasaun Gender Equality Social Inclusion (GESI) ka igualdade jéneru no inkluzaun sosiál liuhusi integrasaun iha programa sira.
“Integrasaun módulu ida-ne’e iha ami-nia formasaun esensiál tebes atu promove lideransa feto iha ami-nia instituisaun no atu enkoraja igualdade jéneru iha asesu ba serbisu no oportunidade hotu. Nune’e mós, atu kria no hadi’a ambiente ne’ebé konfortável no inkluzivu hodi alkansa igualdade jéneru iha área hotu,” Diretór Ezekutivu MAHON, Leonito Caetano, informa ba Agência Tatoli, iha Farol.
Programa GESI hala’o tanba serbisu hamutuk ho parseiru USAID hodi kapasita foin-sa’e sira iha área edukasaun.
“Programa GESI halao tanba servisu hamutuk no halo parseria ho USAID Ngo advocacy for good Governance Activity hodi kapasita foinsa’e sira iha edukasaun. Oras ne’e fundasaun hala’o mos parseria ho Embaixada Japaun no konstroe ona eskola tolu iha munisipiu Bobonaru no Covalima, nune’e Fundasaun MAHON sei implementa programa GESI iha eskola refere. Ho suporta husi aktividade USAID oras ne’e MAHON kontinua habelár no haklean liután implementasaun program GESI iha MAHON nia aktividade hotu” nia hateten.
Antes ne’e, fundasaun ne’e iha ona parseria ho Embaixada Japaun dezde tinan 2019, ne’ebé hala’o ona edukasaun inkluziva no igualdade.
“Iha tinan-haat nia laran, ami harii eskola tolu iha munisípiu Bobonaro no Covalima hodi promove no asegura partisipasaun asesu edukasaun ba labarik ho defisiénsia fízika,” nia akresenta.
Notísia relevante : Programa kuda kafé mahon iha munisípiu ualu ho plantasaun rihun 800
Leonito Caetano garante katak fundasaun sei implementa programa ne’ebé integra igualdade jéneru no inkluzaun sosiál iha tipu formasaun hotu atu garante direitu, oportunidade no tratamentu hanesan sein diskriminasaun bazeia ba rasa, étniku, kór no klase sosiál.
Iha eventu ne’e, Xefe Departamentu Aprosimasaun Jéneru hosi Sekretaria Estadu Igualdade (SEI), Abílio Barreto, hateten, Governu iha kompromisu atu estabelese parseria ho Organizasaun Naun Governamentál lokál sira hanesan MAHON atu promove feto sira-nia direitu no asesu ba ema ho defisiénsia sira ba edukasaun, servisu, saúde no seluk tan iha aspetu sosiál hotu
“Ita iha kompromisu atu la husik hela ema ida ba kotuk, ezemplu, ami hakarak garante asesu ba edukasaun inkluziva, kualidade no ekuitativu, no promove oportunidade aprendizajen ba ema hotu durante sira-nia moris tomak,” nia akresenta.
Abílio Barreto dehan, oportunidade serbisu no karreira profisionál iha asesu ba saúde, podér no influénsia, Governu sei serbisu atu asegura katak mane no feto sira goza oportunidade, rendimentu, direitu no obrigasaun ne’ebé hanesan iha área hotu.
Jornalista : Osória Marques
Editora : Julia Chatarina
