Ministériu Saúde husu autoridade lokál kontribui advokasia saúde iha Baucau
BAUCAU, 27 marsu 2024 (TATOLI) – Ministériu Saúde (MS) liuhosi Diresaun Nasionál Nutrisaun husu autoridade lokál sira kontribui halo advokasia hodi hasa’e kobertura ba programa nutrisaun, imunizasaun, saneamentu no ijiene inklui saúde inan no oan iha munisípiu Baucau.
Reprezentante Diresaun Nasionál Nutrisaun hosi Ministériu Saúde atuál Ofisiál seguransa Alimentár, Mário Moreira dos Reis, esplika, governu liuhosi MS kontinua fó atensaun ba programa kuidadu saúde primária tanba hakarak redus má-nutrisaun, hasa’e imunizasaun no fó atensaun ba saúde inan no oan.
“Dahuluk tenke halo advokasia ba autoridade lokál hotu-hotu nune’e bele komprende atividade bainhira implementa ona iha baze, kuandu seidauk komprende difisil atu realiza ho di’ak,” Ofisiál seguransa alimentár hateten iha Sentru Konvensaun Baucau (CCB, sigla portugés) Vila Antiga, kuarta ne’e.
Mário dos Reis, argumenta, parte nasionál iha kompeténsia fo orientasaun ba munisípiu sira no apoia hanesan ekipamentu no ai-moruk bainhira Servisu Munisipál Saúde sira presiza nune’e bele atinje meta ne’ebé planeadu ona.
Programa no atividade referida liuhosi faze sira hanesan halo planu asaun, advokasia no ikus implementasaun ne’ebé iha indikadór tolu hanesan rasa badak, krekas no todan menus ne’ebé alvu ba labarik ho tarjetu nasionál pursentu 80 liuliu idade hosi mamuk to’o tinan-lima.
“Husu autoridade lokál hotu atu mobiliza labarik hodi hakbesik ba fasilidade saúde sira atu hetan asisténsia saúde tuir programa governu nune’e bele asegura populasaun iha isin di’ak hotu,” Mário dos Reis akresenta.
Sekretáriu Munisipál Asuntu Administrasaun no Finansa Baucau, Juvinal Daniel Filipe Belo, husu autoridade postu no suku iha Baucau atu apoia inklui suporta programa referida hosi Ministériu Saúde tanba bazeia ba rezolusaun governu númeru 8/2012 ho objetivu atu redús má-nutrisaun no komunidade hotu-hotu tenke asesu ba saúde inklui moris iha ijiene.
“Husu autoridade lokál atu koopera ho Ministériu Saúde atu atinje meta tuir polítika governu nian katak komunidade hotu presiza hetan saúde ne’ebé di’ak,” Juvinal Belo hateten.
Tuir dadus Peskija Ai-han no Nutrisaun Timor-Leste (PANTL) tinan-2020 labarik ne’ebé sofre má-nutrisaun nível nasionál pursentu 47 ne’ebé iha munisípiu Baucau fahe ba kategória hanesan stunting pursentu 48.80, krekas 7%, rasa badak 27.3%, susubeen-inan 70.3%, mínimu dieta 22.8%, minimum acceptable 9.3% no konsume masin iodu pursentu 86.8.
Bazeia ba dadus iha leten, Servisu Munisipál Saúde Baucau iha tinan 2023 liuhosi programa nutrisaun halo kobertura ba LISIO ho tarjeitu hamutuk labarik 13.229 ho atinjimentu pursentu 102 hosi labarik 13.471.
Nune’e mos, kobertura tetu atinje pursentu 51 ka 6.809 hosi tarjeitu 13.229, kobertura todan menus atinje pursentu 2 ka labarik hamutuk 134 hosi tarjeitu 13.229.
Jornalista : Natalino Belo
Editór : Evaristo Soares Martins
