COVALIMA, 27 Marsu 2024 (TATOLI) – Servisu Munisipál Edukasaun Covalima implementa, iha tinan ne’e, Programa Merenda Eskolár ba estudante pré-eskolár no ensinu báziku hamutuk 17.804 ho nia orsamentu $1,016.964.48.
Xefe Departamentu Jestaun Programa Edukasaun, Gregório Ferreira Afonso, hateten Programa Merenda Eskolár ba tinan 2024 seidauk implementa no foin mak asina kontratu ho ekipa jestaun programa (EJP) 23 iha Covalima
“Bazeia ba Planu Asaun Anuál (PAA) orsamentu ba programa merenda eskolár hamutuk $ 1,471.636, maibé iha implementasaun sei gasta deit $1.016.964.48”, Gregório Afonso informa iha Santa Rosa, ohin.
Nia esplika katak iha implementasaun merenda eskolár bazeia ba eskola ne’ebé eziste iha Covalima hamutuk 138 no benefisiáriu 17.804, ne’ebé mai husi pré-eskolár 1.778 ho nia orsamentu $101.559.36 no ensinu báziku 16.026 ho nia verba $915.405.12.
Tuir kalendáriu nasionál, relizasaun Programa Merenda Eskolár 2024 durante loron 191, maibé imlementa de’it durante loron efetivu 136, tanba iha trimestre dahuluk la konsege realiza.
Iha Covalima seidauk implementa merenda eskolár no Servisu Munisipál Edukasaun submete ona proposta ba finansa hodi hetan aprovasaun husi Prezidente Autoridade Covalima hodi hein orsamentu hodi implementa programa referidu iha Abríl. Merenda eskolár ne’e sei la’o tuir menú ne’ebé deside ona husi ministériu relevante hodi fó ai-han nutritiva ba alunu-sira. Merenda eskolár ba kada estudante mak sentavu 0,42 ba loron ida efetivu.
“Ita diskute hela atu fó han estudante ho batar ain-naruk, maibé sei ko’alia ho ONG MOKATIL nia stock sufisiente ka la’e, tanba implementasaun merenda eskolár ne’e Ekipa Jestaun Programa sosa produtu lokál hodi fó han ba estudante sira”, nia realsa.
Xefe Suku Belekasak, Leonito Gusmão, apoia implementa programa referidu, maibé presiza atu haree mós problema hanesan eskola balun la asesu bee-moos, laiha armazein oinsá bele garante hahán ijiene ba alunu sira.
“Ita hakarak sosa produtu lokál, maibé iha implementasaun la tuir ita ko’alia, tanba balun dehan la iha produtu lokál, maibé ita iha hela produtu atu fornese ba merenda eskolár”, dehan.
Notísia relevante: Programa Merenda Eskolár iha Covalima ezekuta ona rihun $973
Jornalista: Celestina Teles
Editora: Maria Auxiliadora
