iklan

BAUCAU, HEADLINE, MUNISÍPIU, SAÚDE

Sentru Saúde Baguia kontinua menus pesoál saúde

Sentru Saúde Baguia kontinua menus pesoál saúde

Xefe Sentru Saúde Baguia, José Alves. Imajen Agência TATOLI/Natalino Belo.

BAUCAU, 27 marsu 2024 (TATOLI) – Sentru Saúde iha postu administrativu Baguia kontinua menus rekursu umanu tanba profisionál saúde lato’o.

Xefe Sentru Saúde Postu Administrativu Baguia, José Alves esplika, maske Ministériu Saúde destaka ona funsionáriu kontratadu foun hamutuk 10, Maibé nafatin menus rekursu umanu.

Nia dehan, profisionál saúde funsionáriu kontratadu foun na’in-10 nee seidauk to’o tanba perkore sentru saúde no postu saúde iha Baguia.

“Baguia sei presiza tanba alende sentru saúde, postu saúde sira presiza tan atu aumenta rekursu umanu hodi apoia servisu no halao programa sira-ne’ebé planeia ona,” Xefe Sentru Saúde Baguia hateten iha Sentru Konvensaun Baucau (CCB, sigla portugés) Vila Antiga, kuarta ne’e.

Totál funsionáriu ne’ebé oras ne’e halo kna’ar iha sentru saúde Baguia hamutuk 46, kompostuta hosi funsionáriu permanente 43 no kontratadu na’in-tolu nune’e seidauk korresponde ba postu saúde hamutuk haat hanesan postu saúde Larisula, Osso-Huna, Lavateri no Samalari.

“Baguia presiza tan rekursu umanu, tanba ne’e fulan kotuk ami halo ona mapeamentu hato’o ona ba serbisu munisipál saúde tanba fatin balun sei presiza pesoal saúde,” José Alves akresenta.

Ministeriu Saúde liuhosi rekrutamentu funsionáriu kontratadu hamutuk 82, ne’ebé na’in-10 destaka ba Baguia kompostu tékniku administrasaun, promosaun edukasaun no saúde, médiku, parteira no enfremeiru, ne’ebé alende apoia iha sentru saúde Baguia no balun apoia iha postu haat seluk.

Sekretáriu Munisipál Asuntu Administrasaun no Finansa Baucau, Juvinal Daniel Filipe Belo hateten, rekrutamentu funsionáriu saúde hosi MS bazea ba preokupasaun komunidade tanba iha fasilidade saúde sira sei kontinua menus rekursu umanu.

“Bele responde netik ona, iha sentru no postu saúde barak mak husu aumenta pesoál saúde, tanba ne’e Ministériu Saúde halo ona inisiativa hodi responde ba dúvida sira-ne’e,” Juvinal Belo hateten.

Hosi funsionáriu kontratadu 89 sei destaka hotu ba sentru saúde sia no postu saúde 29, komposta hosi médiku na’in-neen, enfermeiru 27, parteira 17, promosaun saúde no saúde públika sia, farmasia haat, tékniku administrasaun ualu, cleaner sia, na’in-rua seluk seidauk deside destaka iha área loloos no supliente na’in-hitu.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!