DILI, 27 marsu 2024 (TATOLI) – Prezidente Repúblika, José Ramos Horta, iha semana ida-ne’e fó apoiu nesesidade báziku ba família sira ne’ebé presiza iha Postu Turiscai, Munisípiu Manufahi no Postu Maubessi, Munisípiu Ainaro no Aileu.
“Apoiu Xefe Estadu nian ne’e liuhusi diresaun sosiedade sivíl no asuntu sosiál sira, apoiu nesesidade báziku sira inklui foos, masin, mina-te’in, manta, terpal no seluk tan entrega ba asrama eskola ida iha Aileu, uma-kain ualu iha Turiscai no uma-kain hitu iha Maubisse,” katak iha nota ne’ebé Agência TATOLI asesu hosi pájina ofisiál Prezidente Repúblika, kuarta ne’e.
Apoiu ne’e la’ós de’it liuhusi pedidu formál ruma ba Prezidente Repúblika, maibé ho de’it husi komentáriu husi rezidente Turiscai, Domingos dos Reis, iha média sosiál Facebook. Bainhira haree komentáriu ne’e, Prezidente haruka kedas funsionáriu sira lori asisténsia diretamente ba komunidade referidu.
“Ha’u sente kontente tebes nu’udar Turiscai nia oan. Ami la hato’o proposta ka pedidu ruma, maibé liuhusi ha’u-nia komentáriu iha média sosiál, Prezidente Ramos Horta organiza atu imi bele mai direita ba ami ho apoiu ida-ne’e,” Domingos dos Reis hato’o ho agradese.
Asisténsia ne’e mós to’o ba asrama ISMAIK Aileu no Sentru Labarik Maria Daisoli iha Aileu.
Apoiu direta ida-ne’e mai husi prezidente nia edifísiu hodi lori nesesidade báziku ba ema sira ne’ebé presiza.
Rekorda fali katak, antes ne’e Prezidente Ramos Horta fó mós asisténsia importante ba família ida-ne’ebé presiza tebes apoiu dezde tinan 2020, hodi hatudu nia kompromisu atu apoia ema sira ne’ebé vulneravel liu iha sosiedade Timor-Leste.
Lucia Amaral, antes ne’e hela iha suku Faturilau, Postu Administrativu Lequidoe ne’ebé dook tebes.
Iha tinan 2020, Prezidente hahú esforsu atu muda sira ba sidade Aileu hodi asegura asesu di’ak liu ba nesesidade bázika sira.
Iha tinan tolu liubá, Prezidente Ramos-Horta fasilita ona apoiu esensiál sira-nian, inklui foos, masin, mina te’in, manta no musketeru ba susuk, liu husi servisu sosiedade sivíl Prezidénsia Repúblika.
Notísia relevante: PR Horta apoia nesesidade bázika ba vítima inséndiu iha Becora
Jornalista: Hortencio Sanchez
Editór: Florencio Miranda Ximenes
