iklan

COVALIMA, HEADLINE

Funsionáriu AMC na’in-34 tama iha lista idade reforma

Funsionáriu AMC na’in-34 tama iha lista idade reforma

Diretór Servisu Administrasaun Munisipál no Rekursu Umanu, José Manuel Gonçalves.

COVALIMA,28 Marsu 2024 (TATOLI) – Funsionáriu públiku (FP) na’in-34 iha Administrasaun Munisípiu Covalima (AMC) tama ona lista idade reforma, informa Diretór Servisu  Administrasaun Munisipál no Rekursu Umanu, José Manuel Gonçalves.

“Ita-nia funsionáriu ne’ebé serbisu iha Administrasaun Munisípiu Covalima hamutuk 308, husi númeru ne’e na’in-34 tama ona idade reforma”, José Manuel Gonçalves hatete iha Sukaer-Laran, ohin.

Dirijente ne’e esplika katak funsionáriu públiku ne’ebé tama iha lista idade reforma ne’e seidauk iha baze legál no parte rekursu umanu halo de’it identifikasaun hodi rejista.

Rekursu umanu  ne’ebé  presta  serbisu iha administrasaun Covalima la sufisiente, tanba-ne’e Diretór José Gonçalves koordena ho Servisu Finansa Munisipál hodi haree orsamentu atu halo rekrutamentu liuhusi konkursu públiku hodi fó oportunidade ba sidadaun-sira atu konkorre ba vaga.

Planu atu halo rekrutamentu ba funsionáriu ne’e prioriza ba Servisu Munisipál Planu Integradu no Dezenvolvimentu, Ajénsia Planeamentu no Fiskalizasaun, Servisu Munisipál Administrasaun Rekursu Umanu, lojístika, Jestaun Merkadu no Turizmu no servisu munisipál sira seluk tuir nesesidade.

Diretór Servisu Munisipál Planeamentu Integradu no Dezenvolvimentu, Carlito Barros Reis, reforsa katak Servisu Munisipál presiza halo rekrutamentu ba funsionáriu hodi apoia serbisu tanba daudaun sei falta.

“Ha’u-nia diresaun, funsionáriu ne’ebé serbisu ativu hamutuk na’in-haat, kompostu husi enjeñeiru ida, ofisiál rua inklui ho diretór. Tanba ne’e, presiza rekruta hodi aumenta funsionáriu neen iha área sira hanesan enjeñeiru sivíl na’in-tolu no arkitetu tolu hodi fó apoia serbisu iha Servisu Munisipál Planeamentu Integradu no Desenvolvimentu”, informa.

Orsamentu Jerál Estadu 2024 ne’ebé aloka ba Autoridade Covalima hamutuk millaun $7,3, ne’ebé distribui ba saláriu no vensimentu millaun $2,3, bens no servisu $846.885, tranferénsia públika millaun $2,6, kapitál menór $166.820 no kapitál dezenvolvimentu millaun $1,4.

Notísia relevante: Komisaun A sei fó prioridade diskute lei reforma obrigatóriu ba FP

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!