OÉ-CUSSE, 28 marsu 2024 (TATOLI) – Governu liuhosi Ministériu Interiór (MI), kinta ne’e apoia motorizada rua ho televizaun unidade haat ba postu Unidade Polísia Fronteira (UPF), kompañia Carlie iha Rejiaun Administrativa Espesiál Oé-Cusse Ambeno (RAEOA).
Notísia relevante: UPF sei enfrenta problema rekursu umanu no fasilidade asegura fronteira terrestre
Komandante UPF, Superintendente Euclides Belo, informa, apoia hirak-ne’e mai hosi Ministériu Interiór, atu fasilita servisu patrullamentu UPF iha fronteira no bele mós asesu informasaun liuhosi televizaun iha liña fronteira.
“Tan ne’e maka kompañia Carlie Oé-Cusse liuliu postu Krúz no postu Citrana, ita haree postu rua ne’e izoladu ne’e maka hetan mororizada rua ne’e, komandante mak lidera postu nu’udar responsabilidade másimu, entaun ami entrega ba nia, maibé motorizada rua ne’e, orgánika ba postu, bele utiliza hodi halo patrullamentu ba membru sira-ne’ebé maka koloka iha postu rua ne’e,” Euclides Belo, koa’lia iha ámbitu seremónia distribuisaun ne’e.
Governu apoia mós televizaun haat, ba postu ne’ebé seidauk iha televizaun maibé liña eletrisidade iha ona, nune’e labele lakon informasaun ho situasaun nasionál rejionál no situasaun globál.
“Sira bele akompaña, nune’e bele partilla tutan informasaun ho pozitivu ba komunidade sira iha liña fronteira, tanba moto serbisu Unidade Patrullamentu Fronteira, katak, servisu hamutuk garante liña fronteira sai fatin seguru ba ema hotu-hotu no papél UPF mós hala’o edukasaun sívika ba komunidade sira entaun sira tenke asesu informasaun pozitivu real no loloos,”nia katak.
Nia dehan, komandu PNTL fasilita mós rádiu ba membru PNTL hotu iha territóriu nasionál, nu’udar komunikasaun ativu entre membru sira.
“Iha tempu besik, karik semana rua-tán rádiu komunikasaun mós sei entrega mai ami atubele utíliza hodi halo komunikasaun ativu, entre polísia hotu iha territóriu nasionál la’ós UPF de’it, ne’ebé prosesu la’o daudaun, sesaun lojístika PNTL nian atu oferese ba PNTL sira hotu,” nia katak.
Notísia relevante:UPF kontinua vijilánsia iha fronteira
Entretantu, motorizada rua ne’ebé apoia, ba postu UPF Citrana iha sub-rejiaun Nítibe no postu UPF Krúz hosi sub-rejiaun Pássabe, inklui televizaun unidade haat, apoia ba postu UPF Leolbatan, Mahata, Nípani no postu UPF Krúz Pássabe.
Jornalista: Abílio Elo Nini
Editór: Evaristo Soares Martins
