iklan

EDUKASAUN

Selebrasaun Eukaristia iha kinta-feira santa nu’udar domin no serbí

Selebrasaun Eukaristia iha kinta-feira santa nu’udar domin no serbí

Selebrasaun Eukaristia. Imajen/Espesiál.

DILI, 28 marsu 2024 (TATOLI)–Selebrasaun Eukaristia iha kinta-feira santa nu’udar domin no serbí ne’ebé Jesus halo ba nia apostolu sira no ba sarani ida-idak.

“Ita nu’udar komunidade fiar na´in ne’ebé selebra Eukaristia nu’udar domin no serbíi nian ne’ebé Jesus halo.  Ita kontinua halo liuhosi amululik sira-ne’ebé selebra santa misa. Ita hatudu ita-nia uniaun no domin ho asaun intima ho Maromak hodi Na’in Jesus Kristu. Domin ida-ne’e mak hatudu ba ema Israel  hodi salva sira hosi Ejipto,” Pe. Filipe Cardoso, SDB, hateten iha nia omilia iha misa kinta-feira Santa, iha Parokia Maria Auxiliadora, Comoro, kinta ne´e.

Iha Eukarstia ne’e mós, Jesus fase apostolu sira-nia ain, ne’ebé iha tempu Jesus nian, asaun fase ain hanesan ne’e hahalok ema atan ida-nian, hahalok ospitalidade nian, bainhira bainaka ida mai uma, sira simu ho fase ain.

Padre ne’e husu atu ema hotu loke nia aan buka atu serbíi ema seluk, no ema hotu bele loke no husik nia aan atu Maromak bele ko´alia no transforma liuhosi Eukaristia no Evanjellu.

“Iha evanjellu ohin nian Jesus fase apostolu sira-nia ain. Ida-ne’e mentalidade foun ida-ne’ebé Jesus halo, envez de tau aan nu’udar ema boot, dada ema bara-barak tau aan no tuur iha leten atu ema hotu hana’i no hahi Nia. Maromak nia oan la tau nia aan hanesan Maromak, maibé haraik-aan nu’udar atan. Ida-ne’e hatudu nia domin. Hahalok ida serbí ida-ne’e mak fó aan ba mate. Hadomi fó aan ba mate atu servíi ema seluk, nia tutun no ninin mak fó aan ba mate,” nia dehan.

Jesus fase ain hatudu no husu ema ida-idak atu kontinua hamoos aan, besik ba Maromak, sai komunaun ho Maromak atu sai di’ak liután.

“Papa Bento XVI hateten, atu sai ida ho Maromak, husi ita-nia atitude husik ka lori ita aan ba Maromak. Komunaun ho Maromak atu Maromak fó grasa no forsa ba ita. Serbí no domin, liafuan rua ne’e ita labele separa. Atu serbí katak espresa domin no domin katak serbí. Jesus serbí, to’o ikus mate tanba ita. Ida-ne’e, ohin, Jesus husu atu halo tuir buat ne’ebé nia halo,” nia hateten.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!