iklan

BAUCAU, HEADLINE, MUNISÍPIU, SOSIEDADE SIVĺL

Bispu Leandro: Kruz nu’udar bee-matan salvasaun

Bispu Leandro: Kruz nu’udar bee-matan salvasaun

Sarani iha Igreja Katedrál Vila Antiga Baucau, re'i ai-kruz iha selebrasaun loron sesta-feira santa. Imajen Agência TATOLI/Natalino Belo.

BAUCAU, 28 marsu 2024 (TATOLI) – Bispu Dioseze Baucau, Dom Leandro Maria Alves konsidera Jesus nia mate iha kruz hakarak loke liman ba ema hotu tanba kruz mak sinál bee-matan salvasaun nian.

Bispu Dioseze Baucau, Dom Leandro Maria Alves, esplika, Jesus hakarak saran-aan ba mate halo tuir de’it Maromak nia hakarak nune’e labele lakon nia bibi sira. Ne’e duni durante tempu barak hamutuk ho bibi sira hanesan kura moras no haklaken reinu dame Maromak nian tanba lakohi ema tama ba sala.

“Jesus foti hotu ona ita-nia sala, Jesus lori hotu ona ita-nia todan, tusan sala nian no lori ita-nia kruz atu hetan salvasaun,” Bispu Dioseze Baucau hateten iha Katedrál Vila Antiga, sesta ne’e.

Iha selebrasaun sesta-feira santa, ai-kruz sei liuhosi sarani hotu nia leet atu re’i no adora tanba hosi kruz sei hetan salvasaun, maske kruz tempu uluk nu’udar símbolu maldisaun maibé Jesus transforma sai símbolu salvasaun ka grasa nian.

Razaun fundamentál Jesus saran-aan ba mate iha ai-krus tanba laran luak, mizerikodia no domin ba ema hotu inklui sala na’in sira nune’e fasil perdua ema hotu.

“Hahalok di’ak sira-ne’e mak halo ema seluk laran moras no lori Jesus ba mate,” Dom Leandro Alves akresenta

Iha krus nia tutun, Jesus haksulin ba ema hotu salvasaun liuhosi sorin knotak ne’ebé sulin sai bee no raan hanesan liuhosi Adão nia kanotak Maromak hamoris tan Eva.

Liuhosi Jesus nia mate iha krus konvida ema hotu husik hahalok laran moras maibé buka kuda nafatin domin, halo hahalok di’ak no fó tulun nafatin ema-ne’ebé presiza tulun.

Jornalista   : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!