Estudante rihun 25-resin iha Viqueque frekuenta ezame períodu dahuluk
VIQUEQUE,01 Abríl 2024 (TATOLI)– Estudante husi Ensinu Báziku, Ensinu Sekundáriu Tékniku Vokasionál (ESTV) no Ensinu Sekundáriu Jerál (ESJ) na’in-25.259 iha Munisípiu Viqueque frekuenta ona ezame períodu dahuluk ho prosesu ne’ebé la’o di’ak.
Tuir dadús estudante tinan letivu 2024 ho totál 25.259 ne’ebé partisipa iha ezame referidu, kompostu ensinu báziku na’in-19.889, ESTV na’in-214 no ESJ na’in-5.156.
Kalendáriu hosi Ministériu Edukasaun (ME) ba anu eskolár tinan 2024 hahú fulan-Janeiru to’o Marsu, nune’e iha kalendáriu ezame períodu dahuluk, hahú loron 1 fulan-Abríl.
“Prosesu ezame ba estudante sira iha períodu dahuluk la’o di’ak tanba laiha impedimentu ruma, laiha problema ruma mosu iha eskola sira to’o agora mós ha’u seidauk simu keixa ruma husi eskola hotu-hotu liga ba ezame ida-ne’e”, Diretór Servisu Edukasaun Munisípiu Viqueque, Domingos Brandão, inform aba Agência TATOLI,I.P, segunda ne’e.
Maske, nia dehan iha implikasaun oituan kona-ba profesór kontratadu sira ne’ebé kontratu hotu no la hanorin estudante sira, maibé ME fó orientasaun hodi halo transferénsia hosi eskola sira-ne’ebé profesór sufisiénte atu subtitui ba profesor sira-ne’ebé kontratu hotu.
“Ho transferénsia ne’e, ohin ezame iha eskola hotu la’o normal. Antes tama ba ezame primeiru períodu mós ha’u hato’o ba direjente kada eskola sira katak maske ita iha problema profesór, maibé tenke ba hanorin estudante sira hodi asegura prosesu apredizajen”, nia haktuir.
Ezame sai hanesan avaliasaun ida ba kada estudante sira atubele hatene sira nia-koñesementu. Ezame referidu hahú iha segunda no ramata iha loron 6 Abríl tinan 2024.
Notísia relevante:Sala-de-aula ida akumula estudante 60-resin difikulta ezame períodu dahuluk
Jornalista : Vitorino Lopes da Costa
Editór : Florencio Miranda Ximenes
