iklan

EDUKASAUN

Karta Pastorál Paskua 2024: Seidauk iha edukasaun polítika ba konsensu nasionál

Karta Pastorál Paskua 2024: Seidauk iha edukasaun polítika ba konsensu nasionál

Igreja Katólika liuhosi bispu Dioseze Dili-Baucau no Bobonaro (Maliana), domingu (31 marsu 2024) resuRreisaun ne’e, hasai karta pastorál ba paskua tinan 2024 ba sarani sira iha Timor laran tomak. Imajen/Tatoli.

DILI, 01 abríl 2024 (TATOLI)—Igreja Katólika liuhosi bispu Dioseze Dili-Baucau no Bobonaro (Maliana), domingu (31 marsu 2024) resurreisaun ne’e, hasai karta pastorál ba paskua tinan 2024 ba sarani sira iha Timor laran tomak.

Karta pastorál ne´e hasaoi hosi Bispu Dioseze Maliana nu’udár prezidente Konferénsia Episkopál Timorense (CET, sigla portugés), Dom Norberto Amaral, Arsebispu Arkidioseze Metropolitana Díli nu’udár pro-prezidente CET, Dom Virgilio Kardeál do Carmo da Silva, SDB, ho Bispu Dioseze Baucau nu’udár Sekretáriu Jerál ET, Dom Leandro Maria Alves.

Iha karta pastorál ne´e hateten, iha aspetu polítiku ne´e seidauk iha edukasaun polítika ida ba konsensu nasionál hodi akomoda interrese ema barak nian atu haki’ak kultura polítika saudável ba loron aban bainrua.

“Iha aspeitu polítika, seidauk iha edukasaun no kaderizasaun polítika ida-ne’ebé neon-na’in no loloos hodi karateriza hanoin jerasaun foun sira-nian no seidauk iha mós solusaun di’ak ida atu kombate problema korrupsaun, koluzaun no nepotizmu,” refere karta pastorál ba paskua tinan 2024 ne´ebé bispu sira fó sai iha domingu resurreisaun ne´e.

Iha aspetu edukasaun, karta pastorál ne´e haktuir, kualidade ensinu sei sai preokupasaun boot sosiedade tomak nian no kurríkulu ne’ebé inkonsistente, infraestrutura ne’ebé seidauk prienxe kritériu, kualifikasaun professor sira-nian seidauk tuir ezijénsia sira ensinu nian, sei kuran atensaun adekuada ba profesór sira, graduadu barak la hetan servisu tuir sira-nia formasaun akadémika.

Atu hatene liutan konteúdu kompletu hosi karta pastorál ba paskua tinan 2024 nian ne´e, Agência Tatoli, haktuir;

Na’ilulik, diákonu, madre, irmaun, seminarista, maun-alin no bin-feton sira no ema hotu ne’ebé iha hakaran diak:

Ksolok no dame Kristu moris hi’as nian ba imi hotu!

“Ksolok no esperansa, laran-susar no neon-taridu ema ohin loron nian–liuliu sira-ne’ebé ki’ak no terus–mak ksolok no esperansa, laran-susar no neon-taridu, eskolante sira Kristu nian…”

Ho roman liafuan maklokek Gaudium et spes nian ne’e, mak ami Bispu sira Timor nian hakerek Surat Pastorál ida-ne’e hodi fanu fali sarani sira-nia konsiénsia kona-ba ita-nia realidade moris nu’udár timoroan ne’ebé selebra daudaun festa Paskua.

Paskua katak, hakat liu” eh “‘pasajen husi” terus ba ksolok, atan ba liberdade, mate ba moris hias, nakukun bá naroman, ne’ebé hetan nia sentidu loloos iha Jesus Kristu Nia Terus, Mate no Moris-hi’as de’it.

Páskua tinan ida-ne’e nian akontese iha mundu ida-ne’ebé nakonu ho laran taridu. Ita neon susar bainhira ita akompaña problema sosiál sira-ne’ebé halo ema barak laran taridu no halerik.

Iha nível globál ita haree funu iha rai sira hanesan Ukraina, iha Gaza no iha fatin seluk ne’ebé sei kontínua nafatin lori terus no mate ba ema barak. Iha situasaun sira-ne’e, halo ema barak mate tanba de’it kbiit-na’in sira-nia interese.

Mai ita reza husu pás ba povu Ukranianu no povu sira iha médiu-oriente no dame ba mundu tomak hodi hatán (lia)-menon Amu Papa Francisco nian atu ita uza dalan espirituál Páskua nian hodi hasoru “funu nia been-moruk”.

Iha Timor mós, ita hasoru problema oioin iha aspetu sosiál, polítika, ekonomia, justisa, saúde, edukasaun, ekolojia no seluk tan.

Iha problema boot hirak ne’e nia oin, ami Bispu sira mós preokupa tebes, tanba dalan oioin ona mak líder politiku sira, sosiedade sivíl sira no ema wa’in be iha hakaran di’ak koko atu rezolve ona, maibé ladauk hatudu rezultadu di’ak.

Buat sira-ne’e hotu sai preockupasaun ita hotu nian. Ita labele hakuak liman hodi haree de’it, maibé hamutuk buka dalan oinsá bele hakmaan halerik sira ema wa`in ohin loron nian hanesan tuir mai ne’e.

Aspeto oioin halerik sira

Aspetu morál 

Iha aspetu morál, ita haree Timoroan barak mak hahú lakon konsiénsia ka lakon sentidu pekadu nian. Hahalok pekadu nian moris buras iha sosiedade ida-ne’ebé nakonu ho sentimentu autosufisiente (sente aan natoon ho aan rasik de’it), egoista (hanoin aan de’it), hedonista (hakarak ksolok isin nian de’it) no materialista (kaan sasán sira mundu nian de’it).

Iha tendénsia ema hakarak hasees Maromak husi nia moris, hodi troka ho sasán, ídolu ka maromak falsu no ksolok loron-baluk nian. Bainhira valór morál mak laiha ona halo ema lakon diresaun no laiha tan prinsípiu moris nian; ema sai atan ba nia paisaun, inklinasaun ba buat aat no ba hahalok pekadu sira.

Aspetu sosiál

Iha aspetu sosial, ita hasoru hela krize iha valór sosiál katak relasaun entre ita ema-ne’ebé bei’ala sira uluk kuda ona iha Timoroan sira nia fuan hahú mihis, sentimentu unidade nu’udár timoroan ne’ebé moris husi rai ida-ne’e hahú lakon tan de’it infiltrasaun husi ideia sira grupizmu nian, ne’ebé halo foinsa’e barak haliis ba grupu ida hodi sai funu-baluk ba grupu seluk.

Eziste movimentu no grupu balun iha sosiedade nia leet ne’ebé hanorin kona-ba ódiu, vingansa, violénsia no krime maun-alin oho malu nian. Iha mós família barak ohin loron halerik tan kuran domin iha uma laran, fidelidade iha moris matrimóniu nian sai mihis ba beibeik, oan sira abandonadu tan de’it arrogánsia inan-aman sira-nian, imaturidade iha desizaun atu harii família hamosu abortu no halo uma-kain barak naksobu lalais.

Aspetu poltítika

Iha aspetu polítiku, seidauk iha edukasaun polítika ida ba konsensu nasionál hodi akomoda interrese ema barak nian atu hakiak kultura polítika saudável ba loron aban bainrua: seidauk iha edukasaun no kaderizasaun polítika ida-ne’ebé neon-na’in no loloos hodi karateriza hanoin jerasaun foun sira-nian; seidauk iha mós solusaun di’ak ida atu kompbate problema korrupsaun, koluzaun no nepotizmu.

Aspetu ekonómiku

Iha aspetu ekonómiku, ita-nia setor privadu sei frájil loos no tan ne’e la bele fó kampu servisu (traballu) ba foinsa’e sira. Nu’udár konsekuénsia sira barak ba buka servisu iha rai-li’ur. Roda ekonomia rai-laran sei la’o hakdasak hela, falta kampu servisu, laiha sistema empregu ida-ne’ebé estavel hodi garante traballadór sira-nia moris.

Loos duni, ita rekoñese nia benefísiu boot ba rai-doben ida-ne’e, maibé ita haki’ak daudaun mito do ocidente ba timoroan barak. Katak, iha malae rain mak fó garantia servisu, saláriu no moris di’ak-liu.

Aspetu edukasaun

Iha aspetu edukasaun, kualidade ensinu sei sai preokupasaun boot sosiedade tomak nian: kurríkulu ne’ebé inkonsistente, infraestrutura ne’ebé seidauk prienxe kritériu, kualifikasaun profesór sira-nian seidauk tuir ezijénsia sira ensinu nian, sei kuran atensaun adekuada ba profesór sira no graduadu barak la hetan servisu tuir sira-nia formasaun akadémika.

Aspetu saúde

Iha aspetu saúde nian, kualidade atendimentu servisu saúde sei hasoru dezafiu boot: ema moras barak ta’uk ba ospitál, pasiente barak lakon esperansa, ai-moruk laiha, fasilidade saúde nian la sufisiente, problema má-nutrisaun aas hamosu ra’es no moras oioin, liuliu ba labarik kiik-oan sira. Buat hirak ne’e hotu afeta kualidade moris timoroan sira-nian.

Na’ilulik, diákonu, madre, irmaun, seminarista, maun-alin no bin-feton sira no ema hotu ne’ebé iha hakaran di’ak:

Paskua konvida ita ba ksolok!

Paskua Konvida ita ba ksolok. Ita haksolok tanba ita ema livre; ita hasolok tanba ita roman nia oan; ita haksolok tanba Kristu Moris-hias.

Bainhira ita lee Sagrada Eskritura, ita deskobre beibeik pasajen sira-ne’ebé ko’alia kona-ba Maromak ne’ebé sensivel ho Nia povu nia terus hodi la husik hela sira moris nafatin iha terus laran.

Iha Testamentu Tuan, Livro Êxodo sai nu’udar istória emblematika kona-ba asaun konkreta Maromak nian ne’ebé, ho Moises nu’udár mediadór, soi Maromak Nia povu husi fatin terus atan nian iha rai Ejiptu, iha ukun aat Farão nian lori ba Terra Prometida.

Iha Testamentu Foun, figura Jesus Kristu nian mak modelu perfeitu kona-ba Maromak ne’ebé sensivel no kompasivu ho ema seluk nia terus. Ita bele afirma katak, misaun hotu Jesus Kristu nian mak: “atu haklaken lia-foun di’ak ba ki’ak sira; maksoin ba dadur sira; halo matan-delek sira haree, atu soi sira ne’ebé ema hanehan, hodi haklaken Na’i Nia tinan rahun kmanek nian”.

Nune’e, ita mós simu lia-bolu atu hola parte nafatin iha misaun libertadora Jesus nian ne’e, iha tempu hotu-hotu no iha fatin hotu-hotu ne’ebé ita moris no serbí ba.

Sala no terus barak mosu tanba ita hakarak buka solusaun fasil no lalais ba problema defisil sira.

Bainhira problema sira ema haree fasil loos mak nia solusaun sai defisil liu tan, tanba laiha solusaun fasil bainhira problema ne’e defisil.

Paskua sei sai realidade bainhira timoroan sira hatene hadomi malu, respeita malu, simu-malu, tulun malu, lolo-liman tula-dikur no kahe kbaas ba malu hodi rezolve problema sira-ne’ebé ita hasoru ohin loron.

Laiha solusaun fasil maibé mós laiha problema ne’ebé labele resolve, bainhira ita loke laran hodi servisu hamutuk harii rai Timor-Lorosa’e ne’ebé nabilan no kmanek liu.

Mai ita la’o hamutuk iha komuñaun hodi partisipa iha misaun ida-ne’ebé Kristu Moris-hi’as fó fiar mai ita iha Paskua ida-ne’e.

 

Díli, 31 Marsu 2024, Domingu Paskua da Ressurreição do Senhor

 

Dom Norberto do Amaral

Bispu Maliana no Prezidente CET

ADVERTISEMENT

Dom Virgílio Kardeál do Carmo da Silva, SDB

Arsebispu Metropolita nade Díli no Pro-Prezidente CET

Dom Leandro Maria Alves

Bispu Baucau no Sekretáriu Jerál CET

 

TATOLI

 

iklan
iklan

Leave a Reply

iklan
error: Content is protected !!