iklan

EKONOMIA, HEADLINE

MCI husu funsionáriu DNADMPME atu servisu ho pontualidade 

MCI husu funsionáriu DNADMPME atu servisu ho pontualidade 

Ministru Komérsiu no Indústria, Nino Pereira, bainhira halo vizita hodi haree atividade iha Diresaun Nasionál Apoiu Dezenvolvimentu Mikro-pequena no media empreza, iha Matadouro, Dili, segunda (01 abril 2024). Imajen Tatoli/Antonio Daciparu

DILI, 01 abríl 2024 (TATOLI) – Ministru Komérsiu no Indústria (MCI), Filipus Nino Perreira husu ba funsionáriu sira iha Direção Nacional de Apoio e Desenvolvimentu Micro, Pequenas e Medias Empresas (DNADMPME) atu servisu ho pontualidade.

“Objetivu husi vizita ida-ne’e hodi haree direta funsionamentu no servisu funsionáriu sira-nian ne’ebé mak iha, katak tenke servisu ho pontualidade atu lori diresaun ne’e ba oin”, Nino Perreira dehan ba jornalista sira bainhira konklui vizita DNADMPME iha Matadoru, ohin.

Nia dehan, husi vizita ida-ne’e ho intensaun atu haree servisu hotu ne’ebé mak husi kada diresaun jerál sira, diresaun nasionál, departamentu sira no mós funsionáriu sira iha idaidak nia kna’ar.

“Ohin mai haree sira-nia progresu servisu, koordenasaun ba nivel funsionáriu sira atu sira bele sente katak diresaun ne’ebé sira hala’o kna’ar ba ne’e sira tenke ho responsabilidade, onestidade no disiplina, atu bele hala’o sira-nia servisu ne’e ho vontade tomak, laos mai konforme tuir sira-nia hakarak de’it, maibé sira tenke presta sira-nia dedikasaun no integridade hanesan funsionáriu ida ne’ebé servi ba interese Estadu nian”, nia informa.

Nia hateten, husi vizita ne’e, identifika lakuna balun hanesan funsionáriu tama la tuir oras , depois atu hala’o servisu saida iha sira-nia fatin sira la hatene, entaun prestasaun sira ne’e sei hamosu iha avaliasaun servisu ne’ebé ministériu hala’o iha kada tinan.

“Ami mós identifika lakuna sira hanesan funsionáriu sira tama servisu la tuir oras, mai konforme tuir sira-nia hakarak no sira rasik mós la hatene saida mak sira atu halo iha sira-nia servisu fatin, tanba ne’e mak nivel koordenasaun ne’e importante tebes, tanba prestasaun servisu ida-ne’e sei hamosu iha tempu avaliasaun nian”, nia relata.

Nia afirma, funsionáriu sira ne’ebé mak la disiplina, mai husi funsionáriu kontratu no permanente sira.

Iha fatin hanesan, Diretor DNADMPME, Reinaldo Borges, hateten Ministru Komérsiu Indústria  nia vizita, husu ba funsionáriu sira atu servisu ho pontualidade.

“Diresaun foin mak estabelese iha 2021, entaun ha’u foin mai lidera diresaun ne’e no ha’u mai ha’u nota saida mak MCI ohin ko’alia, entaun durante ne’e ha’u enkontru bebeik ho funsionáriu sira kona-ba pontualidade katak tenke mai servisu ho oras”, Reinaldo Borges haktuir.

Nia husu ba funsionáriu sira atu mai ho oras servisu, nune’e bele servisu ho di’ak liután.

“Sira ne’ebé mak la kumpre pontualidade ne’e ita bele fó sansaun ruma ba funsionáriu sira hanesan bolu atensaun, tanba ha’u-nia funsionáriu barak iha diresaun hanesan kazuál no ajente hamutuk 25 no permanente iha na’in hitu, tanba servisu boot rua ne’ebé mak daudaun ami apoiu ba MCI ne’e mak ami bolu kompetisaun negósiu inovativu no kréditu suave, entaun funsionáriu sira ne’e tenke mai servisu ho di’ak”, nia informa.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!