DILI, 01 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) sosa, iha tinan ne’e, karau susuben hamutuk 50 hodi distribui ba sentru pekuáriu lima ne’ebé instala ona iha munisípiu sira.
Diretór Nasionál Pekuária, Agostu Barros, hatete sentru lima maka Dotik iha Manufahi, Pato-Lautém, Ratahu-Viqueque, Korluli-Bobonaro no Natarbora-Manatuto.
“Karau 50 ne’ebé ministériu atu sosa iha Juñu ne’e sei koloka ba kada sentru hamutuk sanulu. Ba faze dahuluk bainhira iha ona produsaun di’ak maka ministériu sei sosa tan”, informa iha Comoro, ohin.
Tuir nia, prosesu sosa karau ne’e sei liu husi konkursu públiku no ba empreza sira ne’ebé iha interese sei hatama dokumentu. “Sé mak manán sei hetan konfiansa husi ministériu hodi bá sosa karau sira ne’e. Prosesu sei la’o iha fulan ida ne’e, espera katak to’o Juñu bele realiza ona”, dehan.
Karau susuben ne’ebé ministériu hakarak sosa ne’e konsidera karau novilla, signifika karau ne’ebé preparadu ona atu ba produsaun ne’ebé iha ona idade tinan rua. Nune’e, iha 2024 bele prodús ona susun-been.
Ministru Agrikuktura, Marcos da Cruz, husu mís ba Diretór Nasionál Pekuária atu aselera prosesu akizisaun karau susuben hodi bele distribui ba sentru lima iha munisípiu sira, nune’e bele hasa’e produsaun, bainhira tinan rua oin mai ministériu mós bele iha ona karau ne’ebé bele prodús susubeen.
“Ha’u orienta ona parte Pekuária atu tau iha konsiderasau ba kestaun ne’e, tanba ita foin mak prepara atu sosa karau susuben, ne’ebé ha’u hakarak iha faze dahuluk ne’e ita tenke koloka ba sentru lima ne’ebé ita instala ona”, dehan.
Jornalista: Tomé Amado
Editora: Maria Auxiliadora
