iklan

HEADLINE, KAPITÁL

PERMATIL konsege hamoris bee-matan 400 desde tinan 2008

PERMATIL konsege hamoris bee-matan 400 desde tinan 2008

Diretór Ezekutivu PERMATIL, Ego Lemos. Imaen Tatoli/António Gonçalves

DILI, 01 abríl 2024 (TATOLI)—Organizasaun Naun Governamentál (NGO) Permakultura Timor-Leste (PERMATIL) hamoris bee-matan hamutuk 400 iha territóriu laran, desde tinan 2008 to’o tinan ne’e.

“Ita halo kolaborasaun ho autoridade lokál, agrikultór no parseiru sira, konsege  hamoris ona bee-matan besik 400 liuhosi barrajen tradisionál (debu) hodi benefisia ba aldeia 500-resin ho komunidade 4.000 iha territóriu laran,” Diretór Ezekutivu PERMATIL, Ego Lemos, informa ba Agência Tatoli, iha ninia knaar fatin, Palapaço, segunda ne’e.

Objetivu halo debu maka atu reativa bee-matan sira husi foho hodi uza ba bailoro naruk, ne’ebé hosi atividade ne’e ai-horis sira bele moris nafatin hodi evita erupsaun no deslizamentu rai.

“Aleinde ne’e, ita-nia komunidade no agrikultór sira mós bele konsumu no utiliza bee ne’e ba sira-nia atividade,” nia akresenta.

Notísia relevante : Loron Nasional Floresta : PERMATIL rekomenda konserva bee molok kuda ai

Nia dehan, debu ne’e importante no simples tebes, nune’e ema hotu tantu komunidade lokál no agrikultór sira bele halo tanba bainhira atividade ne’e la’o, bee sei moris permanente.

“Ita kontinua serbisu ho autoridade lokál atu hamoris filafali bee-matan ne’ebé abandonadu iha aldeia 500-resin,” Diretór organizasaun tenik.

Aleinde ne’e, PERMATIL mós kapasita joven liuhusi programa sira hodi fasilita komunidade asesu bee iha tempu estraordináriu sira.

Organizasaun ne’e fó ona formasaun ba joven 5.000-resin liuhusi Akampamentu Juvenil PERMATIL ninian oinsá halo konservasaun bee no ai-horis hodi halo prevenasaun ba erupsaun no deslizamentu rai.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!