iklan

HEADLINE, INKLUZAUN SOSIÁL

RFTL tinan ne’e sei realiza kongresu nasionál ba daneen

RFTL tinan ne’e sei realiza kongresu nasionál ba daneen

Prezidente Organizasaun Rede Feto Timor-Leste, Zelia Fernandes. Imajen Tatoli/Francisco Sony

DILI, 01 abríl 2024 (TATOLI)—Organizasaun Rede Feto Timor-Leste (RFTL) planeia ona iha setembru tinan ne’e sei realiza kongresu nasionál ba daneen.

“Kongresu nasionál feto Timor-Leste ne’e importante tanba ita atu redefine filafali plataforma asaun feto Timor-Leste ne’ebé diskute iha kongresu dalimak antes ne’e bele sai hanesan dokumentu polítika hodi bele uza hanesan referénsia advokasia ba iha Governu, entaun oinsá mak Governu integra asuntu feto nian ba programa Governu, ho ida-ne’e mak kongresu agora ita atu haree filafali,” Prezidente Konsellu RFTL, Zelia Fernandes, informa ba Agência Tatoli, iha ninia knaar fatin, Caicoli, segunda ne’e.

Notísia relevante : Rede Feto Aposta Plataforma Prioridade Hitu

Rede Feto bainhira konsege konklui ona preparasaun ba eventu ne’e, maka sei halo monitorizasaun ba plataforma asaun feto Timor-Leste ninian, hafoin hakerek relatóriu.

“Bainhira relatóriu hotu, nia rezultadu ita sei lori fali bá konferénsia munisipál hodi aprezenta no rona fali opiniaun ruma husi konfrensista sira. Durante konferénsia munisipál ne’e, ita sei eleje delegadu sira ba kongresu nasionál feto,” nia akresenta.

Konferénsia munisipál tuir planu sei hahú iha fulan-jullu no agostu, nune’e bainhira ramata maka kongresu nasionál.

RFTL hatama ona proposta ba Governu liuhosi Gabinete Apoiu Sosiedade Sivíl ba atividade kongresu nasionál inklui ba funsionamentu instituisaun ho nia planu no programa sira.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!