Autoridade Munisipál Dili kontrata tan kareta raut lixu 50
DILI, 02 abríl 2024 (TATOLI) – Xefe Departamentu Saneamentu iha Autoridade Munisípiu Dili, Domingos dos Santos Soariano, informa kontrata tan kareta raut lixu 50 hodi tula foer sira iha kapital ba soe iha lixeiru Tibar.
“Horseik segunda 01 abríl, Munisípiu Dili, kontrata tan kareta 50 hodi raut foer iha kapitál Dili hodi reforsa tan kareta 50 ne’ebé mak antes ne’e Governu fó ona kontratu, tanba ita haree lixu nia volume kontinua aas iha fatin barak. Nune’e ho hanoin ida katak kareta 100 ne’ebé mak iha sei redús ona lixu iha Munisípiu Dili”, Domingos dos Santos Soariano ba TATOLI iha nia kna’ar fatin Matadoru, ohin.
Nia informa, lixu kontinua aumenta no empreza ne’ebé mak Governu kontrata hodi raut mós labele, tanba kareta ida nia lokalizasaun raut ne’e ba fatin tolu ka haat, entaun ida-ne’e seidauk rezolve nafatin.
“Ita halo komparasaun ba fulan kotuk katak lixu aumenta, depois kareta ida-nia área ne’e luan, entaun sira foti iha rohan seidauk hotu, iha rohan seluk lixu butuk nafatin, entaun ho ida-ne’e mak ami planu fali iha loron semana santa nia laran katak hahú iha 01 abríl aumenta tan kareta 50 hodi hamutuk ho kareta ne’ebé servisu antes ne’e 50, entaun hahú horseik sira halo ona operasaun ba lalin lixu iha Dili laran hodi lori ba tibar, ne’ebé ita haree took ohin aban bainrua, loron tolu ita haree iha mudansa uitoan ka lae”, nia relata.
Nia esplika, Munisípiu Dili mós kontrata tan pesoál limpeza hamutuk 70 hodi hamoos jardín sira iha Dili ho objetivu atu evita foer barak, ohin sira mós hahú servisu ona.
“Ami mós kontratu tan pesoál limpeza ne’ebé mak hamoos jardín tasi ibun hamutuk 70, ne’ebé ohin sira hahú hala’o servisu husi BJ Habibie no tuir mai iha Largo Lesidere, depois lokraik hahú fali iha jardín Moatel no fatin seluk tan”, nia haktuir.
Tanba ne’e autoridade rekoñese katak lixu iha sidade aumenta nafatin, maibé transporte sira ne’ebé mak iha sei bele redús ona lixu iha kapital Dili.
“Ami rekoñese katak lixu iha sidade Dili aumenta nafatin maibé ba oin aumenta tan transporte atu nune’e bele redús lixu iha sidade laran”, nia adianta.
Nia hateten, kareta 50 ne’ebé autoridade aumenta husi empreza lima ne’ebé mak antes ne’e hala’o ona servisu ho objetivu hodi habadak sira-nia área raut foer ne’e iha loron ida de’it. Tanba kareta sira-ne’e pesoál hamutuk na’in lima inklui kondutór, entaun autoridade tau nafatin pesoál sira atu bele raut foer sira.
“Ba ha’u garante katak ho kareta ne’ebé mak aumenta, ita bele redús lixu iha kapitál Dili hodi sidade ne’e bele furak liután”, nia inforsa.
Nia konta, kareta 100 ne’e fahe ba kada Postu Administrativu haat iha Dili hanesan Postu Adminsitrativu Dom Aleixo Empreza rua GSA no NELSES, agora husi empreza rua ne’e ida ba raut foer iha Lot A kareta hamutuk 26, Lot B kareta 23, agora ba Postu Administrativu Vera Kruz, empreza PELIBRA ho nia kareta hamutuk 16, Postu Administrativu Na’in Feto Empreza JAKRILO ho nia kareta hamutuk 20 no Postu Administrativu Cristo Rei ho Empreza LABILAY ho nia kareta hamutuk 15.
Jornalista : Felicdade Ximenes
Editór : Zezito Silva
