iklan

HEADLINE, LIQUIÇÁ

PR Horta simu konvite partisipa komemorasaun loron masakre Liquiça

PR Horta simu konvite partisipa komemorasaun loron masakre Liquiça

Imajen/espesiál

DILI, 02 abríl 2024 (TATOLI) – Prezidente Repúblika, José Ramos Horta, simu konvite husi Komisaun Organizadora ba selebrasaun Masakre iha Igreja Parókia  Liquiça, ne’ebé sei selebra ba tinan-25, iha loron 06 Abríl tinan ne’e.

Reprezentante Komisaun Organizadora ba selebrasaun ne’e, atuál Prezidente Autoriade Munisípiu Liquiça (PAM),Paulino Ribeiro, hatete, iha selebrasaun ne’e tenke partisipa hosi Prezidente Repúblika ho nune’e mak lori konvite na Xefe Estadu.

Notísia relevante: Sobrevivente Konsidera Masakre Likisa Seidauk iha Akuntabilidade ba Justisa

“Prezidente Repúblika disponível atu partisipa, iha komemorasaun ne’e,” Paulino tenik liuhosi nota ne’ebé Agência TATOLI asesu hosi pájina ofisiál Palasiu Prezidensiál, foin lalais.

Nia dehan, atividade ne’e sei taka ho missa iha loron masakre, maibé loron rua antes sei iha eventu sira hanesan semináriu durante loron rua ho oradór sira hanesan Prezidente Ramos Horta no Xefe Governu Kay Rala Xanana Gusmão no expozisaun fotografia ba vítima masakre.

Rekorda fali katak, tuir relatóriu CAVR nian fó sai katak, 06 abríl tina 1999, maizumenus ema neen-nulu (60) to’o atus-ida (100) husi populasaun sivíl sira ne’ebé refuzia iha igreja São João de Brito mak hetan oho husi Milisia Besi Merah Putih (BMP) hamutuk ho Militár Indonézia husi KODIM 1638 Liquiça, Koramil Maubara, Membru KOPASSUS Satgas Tribuana VIII, Membru Batallaun 143 no membru BRIMOB husi Díli ne’ebé uza hotu máskara (topeng) taka sira nia oin, halo atake ba igreja ne’e.

Númeru ema ne’ebé mate ne’e seidauk serteza no to’o agora seidauk identifika fatin ne’ebé ema hirak ne’e hakoi ba.

Notísia relevante: Hanoin Hikas Masakre Liquiçá Ho Semináriu Nasionál Loron Tolu

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!