DILI, 02 abríl 2024 (TATOLI) –Sarani Katólika Timoroan sira ne’ebé mak oras ne’e daudaun hela iha sidade Peterborough, partisipa iha misa Domingu Resureisaun hodi selebra loron Na’i Jesus Kristus moris hias hosi mate. Misa ho lian Inglés diriji diretamente hosi Rev. Pe. Adam Sawo, iha Igreja St. Peter and All Soul’s, Peterborough, iha loron domingu, 31 marsu 2024.
“Ha’u-nia laran ksolok tebes haree sarani Timoroan sira unidu iha loron espesiál ida ne’e hodi hametin fiar no esperansa hodi selebra loron resurreisaun Na’i Jesus Kristu nian. Timoroan hanesan imigrante sira seluk kontribui maka’as ba Igreja ida ne’e no mós kontribui nafatin ba Igreja iha imi-nia rain Timor-Leste,” Padre Adam tenik iha ninia omília, tuir komunikadu ba TATOLI, ohin.
Durante selebrasaun misa eukaristia ida ne’e, grupu Korál Sta. Cecilia Peterborough mak hananu.
Iha fali loron sesta-feira Santa, 29 marsu, loron Paixaun Kristu nian, sarani Katólika Timoroan sira halo prosisaun hodi lori krús Santa lao hosi Igreja Sacred Heart and Saint Oswald’s to’o iha Cathedral Square, sidadi Peterborough. Bainhira to’o iha Cathedral Square, parokia St. Oswald’s junta hamutuk ho sarani katólika hosi parókia sira seluk hodi selebra Paixaun Kristu, hanoin hikas kona-ba Jesus Kristu nia loron mate.
Igreja St. Peter and St. Oswald’s nu’udar igreja ne’ebé sempre fó apoiu ba sarani Katólika Timoroan iha sidade Peterborough.
Hafoin Timor-Leste ukun rasik-an, Timoroan barak feto no mane desidi buka moris no servisu iha Reinu Unidu. Oras ne’e besik ema rihun ida resin moris no servisu iha sidadi Peterborough. Inan no aman servisu makaas iha fábrika, maibé oan sira frekuenta eskola bázika to’o universitáriu.
Entretantu, East Timorese Association Peterborough (ETAP) hamriik dezde tinan 2010 ho objetivu atu promove Timor-Leste no atu fó suporte ba Timoroan sira. Duranti tinan 14 nia laran, ETAP konvida ona padre nain hitu, bispu ida no kardeál Sua Eminénsia Kardeál Virgílio da Carmo mai vizita sarani Katólika Timoroan iha sidadi Peterborough. Populasaun Timoroan iha sidadi Peterborough aumenta ba nafatin tanba labarik-ki’ik sira kontinua moris no mós tanba kontinua Timoroan mai UK hodi buka servisu no moris foun.
Timoroan iha sidade seluk mós organiza via sakra, prosisaun no misa durante tempu Paskoa ne’e.
Tatoli
