DILI, 03 abríl 2024 (TATOLI)—Superintendente Servisu Edukasaun Munisípiu Dili, Cesarina Guterres, hateten lansamentu abertura programa merenda eskolár iha EBC Faról afeta ba estudante balun tuur iha rai hodi tuir ezame períodu dahuluk, tanba karteira eskolár utiliza ba atividade lansamentu ne´e.
“Hanesan akontese iha Eskola Ensinu Báziku Sentrál (EBC-sigla portugés) Faról, iha segunda liubá ne’e, loos duni maibé la’ós laiha preparasaun maibé tanba atividade rua ne’ebé akontese iha fatin ida entaun afeta fali ba ezame primeiru períodu, loron dahuluk ne’e. Lansamentu merenda eskolár no ezame ho loron, oras no fatin ne’ebé hanesan. Tanba karteira eskolár ne’ebé estudante uza hodi ezame ne’e, utiliza tiha fali ba atividade abertura merenda eskolár nian entaun afeta fali ba prosesu ezame nian maibé la’ós ba estudante hotu-hotu. Iha saladeaula ida mak estudante balun tuur rai,” nia superintendente dehan ba Agência Tatoli, hafoin halo inspesaun ba EBC Faról, Dili, kuarta ne’e.
Superintendente haktuir, iha 09h00 estudante ho profesór simu Sekretáriu Estadu Ensinu Sekundáriu Jerál no Ensinu Tékniku Vokasionál ho Prezidente Autoridade Munisípiu Dili, lansa ne’e la’o ho di’ak no mós ezame ne’e estudante no profesór mós tama, ezame la’o normal maibé depois atividade hotu, liu 12h00, simu informasaun dehan estudante tuur rai mak ezame.
“Ha’u orienta kedas ami-nia inspetór tun direita mai eskola referida hodi konfirma akontesementu ne’e ba diretora eskola, no dehan loos duni akontese. Tanba kadeira barak mak utiliza fali iha sala profesór hodi halo atividade lansamentu, maibé loron daruak no ohin la’o normál fali ona. Tanba ne’e, hanesan superintendente hakarak hato’o ba públiku katak la’ós kadeira mak la to’o maibé tanba atividade ezame primeiru períodu ho abertura merenda eskolár la’o dala ida, klaru afeta labarik sira-nia prosesu ezame nian,” nia dehan.
Supertidente hateten, ohin ezame ba loron datoluk ona maibé seidauk simu informasaun ligadu ho fasilidade eskolár, menus profesór, ne’e siginifika buat hotu la’o di’ak no la’ós dehan karteira eskolár mak laiha ka la to’o, ne’e la loos.
Entretantu kona-ba Eskola Sekundáriu Jerál (ESJ), 4 Setembru UNAMET ne’ebé afeta inundasaun, nia hateten, loos duni tempu udan sempre akontese maibé bee ne’e la’ós hosi eskola laran mai mak sai, maibé bainhira inundasaun ne’e bee maihosi estrada públiku nian mak tama mai laran entaun presiza ema hotu nia atensaun la’ós edukasaun nian de’it.
“Maibé tempu badak sei hadi’a, tanba ita-nia superiór simu no haree ona,” nia hateten.
Iha fatin hanesan, Diretora EBC Faról, Filomena Belo Freitas, hateten loos duni akontese maibé asegura kedas iha momentu ne’ebá la’ós sala hotu-hotu maibé iha saladeaula ida mak estudante na’in-hitu (7) mak tuur rai, tanba iha kadeira ida ema na’in-tolu (3) entaun profesór fahe tiha.
“Maibé, ha’u rasik ba haree no foti kadeira iha sala profesór nian hodi estudante uza, no hosi ne’e la’o normál, to’o ohin dadeer ne’e. Ita-boot sira bele observa direta saladeaula sira, daudaun ne’e, estudante na’in rua-rua mak tuur iha kadeira ida,” diretora ne’e dehan.
Tanba ne’e, nia hakarak hato’o ba públiku ligadu ho informasaun viral iha mídia sosiál katak la’ós estudante hotu-hotu tuur iha rai maibé iha balun de’it no ida-ne’e mós tan iha atividade abertura merenda eskolár.
Ho akontesimentu ne’e, nia rekomenda ba Ministériu Edukasaun (ME), EBC Faról hamutuk 300, nune’e fasilita di’ak liután.
Totál estudante iha EBC Faról hamutuk 2.256, ne’e inklui ho Eskola filiál sira seluk.
Jornalista : Osória Marques
Editór : Cancio Ximenes
