Medikamentu item 171 estoke out iha SAMES Baucau

BAUCAU, 03 abríl 2024 (TATOLI) – Medikamentu hamutuk item 171 komposta hosi ekipamentu médiku no ai-moruk estoke out iha Servisu Autónomu Medikamentu, Ekipamentu Saúde, Institutu Publiku (SAMES.IP) iha Rejionál Baucau.

Xefe Departamentu SAMES.IP Rejionál Baucau, João Cancio Ximenes Hornai esplika, hosi númeru referidu korresponde ba 29% ne’ebé estoke out iha fulan-marsu tanba hatán ba pedidu no halo distribuisaun ba fasilidade saúde inklui ospitál sira iha área leste komposta hosi munisípiu Lautém, Viqueque no Baucau.

“Provizóriu estoke hotu 171 (29%) item mak laiha,” Xefe Departamentu SAMES.IP rejionál Baucau hateten iha Vila Nova, kuarta ne’e.

Hosi estoke ne’ebé iha SAMES.IP Baucau hamutuk totál item 587 no oras ne’e hela item 416 (71%), enkuantu 171 (29%) mak estoke out ne’ebé fahe ba kategória tolu hanesan vitál, esensiál no nesesáriu.

Kategória tolu ne’e hanesan vitál utiliza ba kuidadu saúde sekundáriu iha ospitál sira hanesan infeksaun no oksijéniu ne’ebé estoke out (20%) no disponível 80%.

Ai-moruk esensiál maioria utiliza iha servisu saúde munisipál no ospitál sira-ne’ebé estoke atuál hela 61% no estoke out 31%.

Enkuantu ai-moruk nesesáriu komposta hosi ai-moruk ne’ebé pasiente presiza atu hasa’e imunidade no oras ne’e hela 75% no estoke out 25%.

“Estoke out tanba ita halo distribuisaun, sasán la permanente iha fatin, bainhira sasán tama mai pedidu hosi fasilidade saúde no ospitál sira mai ita distribui kedas,” João Hornai akresenta.

SAMES.IP Rejional Baucau hato’o ona pedidu ba nasionál antes loron-lima tuir prosedimentu nune’e bele responde ba estoke out ba medikamentu no konsumável iha armazein rejionál Baucau.

Jornalista   : Natalino Belo 

Editór         : Evaristo Soares Martins