iklan

COVALIMA, HEADLINE

MSSI disemina Rejime Jurídiku Instituisionál Solidariedade Sosiál ba entidade sira iha Covalima

MSSI disemina Rejime Jurídiku Instituisionál Solidariedade Sosiál ba entidade sira iha Covalima

MSSI disemina Rejime Jurídiku Instituisionál Solidariedade Sosiál ba entidade sira iha Covalima. Imajen/Celestina Teles.

COVALIMA, 03 Abríl  2024 (TATOLI) – Diresaun Nasionál Kooperasaun no Parseria husi Ministériu Solidariedade Sosiál no Inkluzaun (MSSI) disemina Dekretu-lei númeru 25/2017, 26 Fevereiru, kona-ba Rejime Jurídiku Instituisionál Solidariedade Sosiál (ISS) ba entidade sira iha Covalima.

Diretór Nasionál Kooperasaun no Parséria, Adão Pinto, hatete divulgasaun informasaun ba rejime jurídiku ne’e parte ida atu hasa’e koñesimentu hodi uniformiza persepsaun téknika relasiona ho ferramente legál.

“Ho disemina informasaun fó biban ba instituisaun sira ne’ebé hala’o serbisu iha área sosiál no parte intresada hakarak aplika hodi hetan utilidade sosiál ba servisu iha asuntu sosiál ni’an atu hatene lala’ok oinsá mak bele aplika no nia prosesu atu hetan rejistu no lisensiamentu ba atividade sosiál. Ida ne’e fó biban mós ba autoridade lokál sira atu tau-matan ba instituisaun solidariedade sosiál hala’o serbisu ba asuntu sosiál sira no bele mós superviziona serbisu ne’ebé durante ne’e la’o ona”, dirijente ne’e esplika, ohin.

Adão Pinto salienta katak Estadu hakarak fó estatutu utilidade sosiál no rejistu Instituisaun Solidareidade Sosiál (ISS) atu rekoñese konstribuisaun husi entidade sira ne’ebé laiha fin lukrativu, iha efetivasaun husi protesaun sosiál ba sidadaun sira, kria baze dadus ne’ebé permite atu halibur organiza no hatene informasaun relevante kona-ba ISS no sira-nia atividade no estabelese direitu no devér sira husi ISS.

Konstituisaun RDTL artigu 56 ko’alia kona-ba seguransa no tulun sosiál ne’ebé hatete sidadaun hothotu iha direitu ba seguransa no asisténsia sosiál tuir lei haruka, Estadu hola medida-sira tuir nia kbiit nasionál nian, hodi halo organizasaun ho nia sistema-ida ba seguransa sosiál no Estadu apoia no fiskaliza, tuir lei, ba serbisu no funsaun instituisaun solidariedade sosiál nian, no seluk tan ne’ebé nu’udar interese públiku la buka lukru/funan.

Tuir dadus, instituisaun ne’ebé serbisu hamutuk ho Sentru Soslidaridade Sosiál no Inkluzasaun hodi haree kona-ba asuntu sosiál hamutuk tolunulu ho nia tipu apoiu sosiál ne’ebé la hanesan ba família vulneravel, ema ho defisiénsia no seluk tan.

Sekretáriu Munisipál ba Asuntu Sosiál no Organizasaun, Filomeno Cardoso, husu ba partisipante atu partisipa másima hodi rona informasaun kona-ba Dekretu-lei númeru 25/2017, 26 fevereiru hodi bele komprende.

“Saida mak diresaun nasionál fahe, ita hotu bele komprende ho di’ak kona-ba asuntu Instituisaun Sosilidariedade Sosiál ne’ebe hala’o sira-nia atividade kona-ba asuntu sosial nian”, dehan.

Partisipante sira mai husi uma mahon, PERADET, KDESTO, administradór postu Hitu, Fokupers, RHTO no PNTL-VPU.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!