DILI, 03 abríl 2024 (TATOLI)–Prezidente Repúblika, José Ramos Horta, agradese ba médiku Kubanu hotu ne’ebé durante ne’e dedika aan ka servisu ona iha fasilidade saúde sira hodi fó asisténsia médiku ba timoroan sira iha nivél nasionál.
Xefe Estadu hato’o lia hirak ne’e bainhira partisipa iha komemorasaun aniversáriu Brigada Médiku Kubano nia-estadia iha Timor-Leste ba dala-20 ne’ebé selebra iha Salaun Nobre Ministériu Negósiu Estranjeiru no Kooperasaun (MNEK), kuarta ne’e.
“Ohin, ita selebra aniversáriu médiku Kubanu sira mai iha Timor-Leste tanba kompleta ona tinan 20. Agradese ba médiku Kuba sira hotu ne’ebé mak durante tinan barak fó ona tratamentu saúde mai timoroan sira, agradese mós ba Governu Kuba ba apoiu tomak ne’ebé fó ona mai Timor-Leste,” Xefe Estadu agradese.
Iha fatin hanesan, Embaxadora Kuba iha Timor-Leste, Grisel Alina Aldama Inniss, agradese mós ba Estadu Timor-Leste ne’ebé kontinua hametin relasaun bilaterál ho Estadu Kuba. Nune’e ba oin sei kontinua hametin liután.
“Agradese ba Timor-Leste ne’ebé koopera di’ak tebes ho médiku Kubanu sira. Tanba Médiku Kubano sira kada loron halo hela tratamentu ba timoroan sira iha territóriu tomak no sira nia prezensa iha ne’e koopera di’ak tebes ho médiku timoroan sira,” katak Embaixadora ne’e.
Tuir dadus ne’ebé iha durante kooperasaun timoroan hamutuk 1.000-resin mak hasai ona kursu médiku iha Kuba no iha Timor-Leste liuliu iha Universidade Nasionál Timor-Lorosa’e (UNTL). Daudaun, timoroan ne’ebé sei iha prosesu atu hasai kursu médiku iha Kuba no Timor-Leste hamutuk 1.155 hosi númeru ne’e na’in-900 mak estuda hela iha UNTL no seluk iha Kuba.
Alende ne’e, Médiku Kubanu ne’ebé hala’o hela serbisu iha Timor-Leste hamutuk 160.
Molok ne’e, Prezidente Asosiasaun Médiku Timor-Leste (AMTL), Rui Maria de Araújo, hateten AMTL, Embaixada Kuba no Brigada Médiku Kubanu diskute ona oinsá atu hasa’e kualidade estudante sira ne’ebé sei frekuenta hela estudu.
“Númeru médiku ne’ebé prodús hosi Kuba barak tebes no estudante ne’ebé daudaun eskola hela kona-bá médiku iha UNTL mós barak tebes, ida-ne’e sinál pozitivu. Nune’e ami mós ko’alia ba oin atu haree ba nia kualidade,” dehan nia.
Notísia relevante: Médiku espesialista Kubanu 116 mak servisu iha TL
Jornalista: Hortencio Sanchez
Editór : Florencio Miranda Ximenes
