DILI, 03 abríl 2024 (TATOLI) – Tribunál Judisiál Primeira Instánsia Dili (TJPID), iha kuarta (3/4), halo interogatóriu dahuluk ba arguidu na’in-tolu ho inisiál MMH, ET no AM ne’ebé komete krime furtu agravadu iha Munisípiu Liquiça foun kumpre ona Prizaun Preventiva.
Liuhosi interogatóriu, Ministériu Públiku promove ho krime haat ba arguidu sira, krime na’ok ne’ebé previstu iha artigu 253, furtu agravadu iha artigu 252, sekuestru iha artigu 160 hosi Kódigu Penál Timor-Leste, tanba momentu arguidu sira halo asaun kesi tiha loja na’in no Ministériu Públiku promove mós arguidu sira ho krime arma branka ne’ebé previstu iha artigu 20 hosi lei númeiru 7/2017 kona-ba lei arma aranka nian, Ministériu Públiku promove arguidu sira ho krime ne’e tanba momentu arguidu sira antes halo asaun arguidu sira uza sasan kroat hanesan katana hodi hakanek loja na’in.
Defeza hosi arguidu sira, Defensór Públiku Estaqui Guterres, hateten Tribunál hasai despaixu ikus hodi aplika medida koasaun prizaun preventiva ba arguidu na’in-tolu ne’ebé envolve kazu foti subar sasan iha loja iha Liquiça ne’ebé previstu iha artigu 183 hosi Kódigu Prosesu Penál.
Nia dehan, Tribunál aplika medida koasaun Prizaun Preventiva ba arguido hirak ne’e tanba atu asegura arguidu sira iha prizaun hodi labele halo lakon evidénsia sira, kuandu arguidu sira iha liur, Tribunál konsidera arguidu sira bele halo lakon evidénsia sira, arguidu sira bele kontinua nafatin halo fila fali sira-nia atividade no arguidu sira bele hasees aan hosi justisa.
“Haree hosi ida-ne’e mak Tribunál aplika medida ne’ebé adekuada liubá arguidu sira mak Prizaun Preventiva”, Estaqui Guterres hateten ba jornalista sira hafoin konklui interogatóriu dahuluk ba arguidu sira iha Tribunál Judisiál Primeira Instánsia Dili, kuarta, ohin.
Defensór afirma, seidauk bele halo rekursu atu rekore ba despaixu ikus iha Tribunál Judisiál Primeira Instánsia ni’an ba kazu arguidu na’in-tolu, tanba sei haree molok halo rekursu hodi hatan ba despaixu Tribunál nian.
Intergatóriu dahuluk ne’e prezide hosi Juiz Titulár Juiza, Ercilia de Jesus, Ministériu Públiku reprezenta hosi Prokuradór Ricardo Leite no arguidu sira hetan asisténsia legál hosi Defensór Públiku Estaqui Guterres no Manuel Sarmento.
Rekorda fali katak Komandu PNTL Munisípiu Liquiça iha kinta (28/3) foin lalais ne’e detein suspeitu na’in-tolu ho inisiál MMH, ET no AM tanba envolve iha kazu furtu agravadu.
Kazu ne’e akontese iha iha loron 28 fulan marsu 2024 iha oras tuku 3:00 madrugada, iha suspeitu na’in-haat ho isiál CP,ET, AM no MMH halo asaun hodi tama ba loja Xina ida ne’ebé lokaliza iha Munisípiu Liquica hodi na’ok sasan iha loja laran.
Suspeitu sira ne’e maioria hela iha Dili mak ba halo asaun hodi tama loja xineza ida iha Liquiça hodi foti subar sasan sira iha loja ne’e.
Antes suspeitu sira ne’e atu halo asaun ida-ne’e, suspeitu sira ne’e kesi tiha loja na’in ho naran Wang Yong Chau depois mak sira foin halo asaun, hafoin ida-ne’e sira husik fali loja na’in no loja na’in kontatu kedan Komandu PNTL Liquiça no momentu hanesan PNTL Liquiça halo kedan atuasaun suspeitu sira no detein kedan suspeitu sira MMH, ET no AM enkuantu CP halai lakon tiha.
Durante suspeitu sira halo asaun ne’e, sira konsege foti osan hamutuk $7000-resin iha loja laran, kompostu hosi osan tahan $5.000 no osan rahun besi hamutuk $2.000.
“Momentu ne’ebá, ita-nia PNTL Liquiça halo kedan atuasaun hodi halo kapturasaun ba suspeitu na’in-tolu ho inisiál MMH, ET no AM, enkuantu suspeitu na’in-ida seluk ho insiál CP, momentu ne’e halai tiha, maibé PNTL husu mandadu Ministériu Públiku hodi kontinua buka tuir suspeitu ne’e hodi bele halo mós kapturasaun ba suspeitu ne’e”, Portavós Komandu Jerál PNTL Superintendente Polísia António da Luz, hateten ba jornalista sira iha Komandu Jerál PNTL, Segunda, ohin.
Hafoin atuasaun polisiál ba suspeitu na’in-tolu, Komandu PNTL Liquiça detein kedan iha sela detensaun komandu PNTL Liquica hodi kumpre oras 72 molok aprezenta ba interogatóriu dahuluk iha Tribunál Judisiál Primeiru Instánsia Dili.
Depoisde Komandu PNTL Liquiça halo tiha detensaun, Komandu PNTL Liquica mós preende vidénsia sira hanesan tali ne’ebé suspeitu sira uza kesi loja nain, katana ida, sabit ida ne’ebé momentu ne’ebá supeitu sira uza hodi ameasa loja na’in hodi foti subar sasan sira iha loja laran. No asegura mós karreta Landcruzer ho kor silver ida ho sapa martríkula 23.035 no karreta marka Masda CS7 kór mutin ho sapa matríkula A 12.470TL.
“Karreta sira ne’e suspeitu sira aluga husi rentál ida iha Dili hodi uza ba halo asaun tama loja Xineza ida iha Liquiça no dokumentu husi karreta sira ne’e inklui xave karreta nian komandu PNTL Liquiça asegura ona nudar evidénsia hodi sustenta ba prosesu investigasaun,”nia konklui.
Jornalista: Natalino Costa
Editór : Zezito Silva
