Foos marka MCAE iha armazem hein orientasaun husi Governu
DILI, 04 abríl 2024 (TATOLI) – Prezidente Sentru Lojístika Nasionál (CLN), Jervazio Cardoso de Jesus da Silva, hateten foos marka MCAE ne’ebé sosa iha nasaun Kambodia nafatin rai iha armazem tanba sei hein orientasaun husi Governu.
“Foos ne’ebé ita sosa iha nasaun Kambodia ho tonelada hamutuk 4.000, daudaun ne’e, sei iha armazem, tanba sei hein orentasuan husi Governu”, Jervazio Cardoso hateten ba TATOLI liuhosi telefone, ohin.
Nia mós esplika katak foos rai ho tonelada hamutuk 1000-resin, sei nafatin iha armazem hodi garante ba situasaun emerjensia sira.
Hatan ba ne’e, Ministru Komérsiu Indústria (MCI), Filipus Nino Pereira, dehan foos marka MCAE mai husi Kambodia, daudaun ne’e, planu ona atu halo intervensaun iha merkadu.
‘’Ita nafatin rezerva foos ida ne’ebé mak mai husi Kambodia, ida-ne’e foos kualidade di’ak ho kilograma 25, tanba ne’e tempu badak ita sei halo intervensaun ba merkadu sira”, Nino afirma.
Antes ne’e, Timor-Leste no Kambodia asina akordu iha 20 outubru 2022 hodi halo akizisaun foos no iha tempu hanesan inisiativa ne’e nu’udar kompromisu Governu nian ne’ebé mak hatuur iha Dekretu Lei 76/2023, kona-ba intervensaun temporaria ba estabilizasaun folin foos iha merkadu ne’ebé sei rai iha armazem CLN.
Foos hirak ne’e, Governu sosa tonelada hamutuk 4.000 ho kustu millaun $3 no liuhosi Empreza Green Trade Company(GTC).
Jornalista : Felicidade Ximenes
Editór : Zezito Silva
