DILI, 04 abríl 2024 (TATOLI) – Primeiru Ministru Kay Rala Xanana Gusmão, informa, Governu submete ona projetu alterasaun ba lei Komisaun Anti Korrupsaun (KAK) ba Parlamentu Nasionál atu halo diskusaun no aprovasaun hodi bele fasilita nomeasaun Komisaun Anti Korrupsaun.
“Lei ne’e ami haruka ona ba Parlamentu Nasionál. Lei ne’e sei lori tempu uitoan tanba Parlamentu sei diskute foin mak halo aprovasaun,” Xefe Governu dehan ba jornalista sira iha Palásiu Prezidensiál, Birru-Pité Dili, kinta ne’e.
Notísia relevante: PN hein Governu aprezenta proposta alterasaun lei CAC
Rekorda fali katak, Konsellu Ministru iha loron 07 fulan-marsu 2024 aprova ona projetu Proposta Lei, ba alterasaun daruak husi Lei numeru 8/2009, loron 15 fulan-jullu, kona-ba Komisaun Anti-Korrupsaun, ne’ebé aprezenta husi Prezidensiál Konsellu Ministru.
Durante KAK harii, ejizénsia husi kuórum deliberativu reforsadu atu hala’o eleisaun ba ninia Komisáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate ba korrupsaun.
Ho diploma ida-ne’e, Komisáriu sei bele eleitu ka ezoneradu ho maioria absoluta husi Deputadu sira iha Parlamentu Nasionál, no sei elimina rekizitu katak tenke pelumenus katoluk haat husi Deputadu sira marka prezensa ne’ebé hala’o hela funsaun.
Proposta Lei ida-ne’e determina mós katak Komisáriu ne’ebé mandatu ramata ona kontinua hala’o nia kna’ar to’o titulár foun simu pose, nune’e bele garante kontinusaun servisu públiku no atinje misaun ne’ebé sai hanesan objetivu hodi kria Komisaun Anti Korrupsaun.
Notísia relevante: PN seidauk simu proposta alterasaun lei CAC husi Governu
Jornalista: Hortencio Sanchez
Editór : Florencio Miranda Ximenes
