VIQUEQUE, 04 abríl 2024 (TATOLI)-Diretór eskola Ensinu Báziku Sentrál númeru 01 Viqueque, Domingos dos Reis, hateten Ministériu Edukasaun (ME) persiza hari’i ona moru protesaun ba iha eskola públiku ne’e, nune’e bele asegura edifisíu públiku ne’e hosi animal ne’ebé oras ne’e tama no sai livre iha areadores eskola ne’ebá durante prosesu aprendijazén la’o hela.
“EBC 01 Viqueque ne’ebé lokaliza iha sentru kapitál munisípiu Viqueque nakloke loos ba públiku tanba laiha moru protesaun, nune’e tempu udan no iha tempu kalan ami-nia eskola nian varanda eskola sira ne’e animál hanesan bibi, karau, fahi no kuda maka nakonu,” Nia relata ba Agência TATOLI, I.P, iha ninia servisu fatin Viqueque, kinta ne’e.
Antes ne’e, nia parte halo ona pedidu ba Governu Sentrál no mós halo ona audensia ho Ministériu Edukasaun hodi informa ka relata situasaun ne’e ba Governu hodi rezolve, maibé to’o oras ne’e, seidauk iha resposta atu oinsá hari’i moru protesaun bá iha eskola públiku ne’e.
Tuir jeografikamente eskola públiku ne’e lokaliza iha kapitál munisípiu Viqueque nian, nune’e sai mós imajen ba munisípiu parte leste ne’e, tanba ne’e, Ministériu Edukasaun persiza tau iha planu hodi fasilita prosesu aprendijazén ba estudante sira.
“Moru protesaun ne’e bele mosu asidente trafégu ba ita-nia oan estudante sira EBC 01 Viqueque no estudante CAFÉ besik rihun 200 resin ne’ebé eskola rua besik malu,” nia hateten.
“Dezafiu ne’ebé tinan maruk ami infrenta maka limpeza aminál nian fo’er, dader estudante no profesór sira mai eskola sala animál nia fo’er nakonu iha varande entaun sira tenke hamoos, tempu apredijazén gasta ba limpaza depois maka hahú ensinu apredijazén iha aula laran. Ha’u-nia esperansa ba Governu agora rezolve ba ami-nia moru protesaun ida-ne’e,” nia hateten.
Tuir dadús EBC 01 Viqueque ho totál estudante 344, profesór na’in-35 ho ninia sala aprendijazén hamutuk 17.
Jornalista : Vitorino Lopes da Costa
Editór : Agapito dos Santos
