DILI, 04 Abríl 2024 (TATOLI) – Governu prevee rihun $500 iha Fundu Infraestrutura ba estudu viabilidade ba fatin konservasaun bee iha Manatuto, Manufahi, no Ainaro, informa Diretór Nasionál Irrigasaun, Ministériu Agrikultura, Pekuária, Peska no Floresta, Jacinto Gama.
Tanba ne’e, Ministériu Agrikultura hein hela aprovasaun orsamentu referidu hosi Konsellu Administrasaun Fundu Infraestruta (KAFI) atu implementa ona programa ne’e.
Programa ne’e rasik sei implementa husi ekipa téknika sira husi MAPPF no Ministériu Planeamentu no Investimentu Estratéjiku (MPIE), tanba estudu ne’e presiza tempu ida adekuadu.
“Ita-nia planu ba estudu ne’e hakarak realiza iha tinan ne’e, maibe depende nia prosesu sira hotu. Bainhira orsamentu ne’e maka hetan aprovasaun lalais iha KAFI, ita bele implementa iha tinan ne’e”, dehan iha Comoro.
Tuir nia, fatin tolu ne’ebé Governu define ona atu halo estudu hodi konstrui fatin rai bee ne’e, sei halo iha Laklo-Manatuto, Sui-Manufahi no Bee Lulik-Ainaro, tanba fatin ne’e estratéjiku no bainhira harii ona maka sei distribui bee ba natar sira iha territóriu.
“Fatin konservasaun bee ne’e kuandu konstrui ona, natar sira sei la susar tan ba bee no sei bele fornese ba natar sira iha área ne’ebé DAM [fatin rai bee] ne’e instala ba”, nia garante.
Entretantu dirijente ne’e fiar katak ekipa téknika sira sei hala sira-nia serbisu ho di’ak hodi aselera prosesu hotu, nune’e bele atinje rezultadu di’ak ruma hodi avansa ba planu sira ne’e.
Ministru Planeamentu no Investimentu Estratéjiku, Gastão de Sousa, hateten katak orsamentu atu halo estudu viabilidade ba fatin konserva bee iha munisípiu tolu ne’e iha ona KAFI, maibé seidauk iha desizaun ruma. “Espera iha tempu besik ne’e bele hetan ona aprovasaun, nune’e bele implementa ona”.
Jornalista: Tomé Amado
Editora: Maria Auxiliadora
