STAE Viqueque kapasita ona PSAS-PSAA hodi realiza eleisaun suku iha Builo
VIQUEQUE,04 abríl 2024 (TATOLI)– Sekretáriadu Tékniku Administrasaun Elietorál (STAE), munisípiu Viqueque, kuarta ne’e, hahú fó kapasitasaun ba Pesoál Servisu Apoia Suku (PSAS) no Pesoal Servisu Apoia Aldeia (PSAA) hodi bele realiza eleisaun xefe suku iha Builo, Postu Administrativu Ossu, Munisípiu, ne’ebé sei realiza loron 27 fulan-Abríl tinan ne’e.
Fulan-ne’e, suku Builo foin realiza eleisaun tanba formasaun suku foun husi suku Ossorua, nune’e mandatu ba xefe suku Builo foin ramata iha fulan-marsu.
Biban ne’e, Diretór STAE munisípiu Viqueque, Humberto Fernandes, informa, eleisaun suku hodi hili Xefe Suku iha tinan-ne’e liuliu iha munisípiu Viqueque akontese de’it ba suku Builo.
“Ami hahú prepara no kapasita Pesoál Servisu Apoia Suku no aldeia ne’ebé STAE rekruta iha semana kotuk liubá. Hafoin formasaun ida-ne’e hotu sira fila ba suku hodi kontinua sensibliza ba ita-nia eleitór sira kona-bá prosesu votasaun nian, atu ita-nia eletór sira labele vota sala”, Diretór ne’e hateten ba jornalista sira, iha ninia kna’ar fatin Viqueque Vila, ohin.
Matéria formasaun, nia dehan kalendáriu eleisaun, regra votasaun, kritéria kandidatura ba xefe suku, xefe aldeia, delegadu no delega inklui mak tenke iha lista eleitór pursente ida husi totál eleitór suku Builo.
“Liu husi formasaun ne’e ita bele ba eduka eleitór sira vota ho loloos tanba votasaun jerál kada eleitór ida simu bulletin votu ida, maibé eleisaun suku eleitór ida simu bulletin votu hamutuk tahan tolu kompostu husi bulletin xefe suku, xefe aldeia no delegadu ou delegada.
Eleisaun suku ne’e lidera direta husi Prezidente Autoridade munisípiu Viqueuque, administradór postu Ossu, xefe suku no xefe aldeia sira.
Bazeia kalendáriu eleisaun komunitária suku husi STAE hahú 12 fulan-Abríl simu kandidatu xefe suku, loron 22 fulan-Abríl distribui bulletin votu ba kada sentru haat iha suku Builo no 27 fulan-Abríl hahú eleisaun iha kada sentru votasaun.
Totál eleitór iha suku Builo 805
Tuir dadús eleitór iha suku Boilo kompostu aldeia haat hanesan aldeia Buareka totál eleitór 152 ho 2%, Builo eleitór 310 ho 3%, Derulo eleitór 259 ho 3% no aldeia Lutugia 84 ho 1%, nune’e totál eleitór hamutuk 805, ne’ebé ekivalente 8%.
Iha fatin hanesan, Xefe suku Builo, Osorio da Silva, konsidera eleisaun suku nu’udar festa família nune’e kandidatu ida-ne’ebé eleitu ba xefe suku presiza kria kooperasaun liuliu hametin pás no establidade iha suku Builo perante eleisaun.
“Ha’u husu eleitór suku Builo tenke partisipa ho asaun ne’ebé kria pás, labele hamosu problema iha suku laran hodi ita hili ita-nia lideransa foun”.
CNE hala’o edukasaun Sivika
Entretantu, Prezidente Autoridade Munisípiu (PAM) Viqueque, Francisco Cruz Simôes de Gonzaga Soares, hala’o sorumutu ho Prezidente Komisaun Nasionál Eleisaun (CNE-sigla Portugés), José Belo, hodi diskute kooperasaun ba realizasaun edukasaun sívika hodi hasa’e taxa partisipasaun eleitór sira-nian.
” Ami-nia pozisaun prontu atu koopera ho CNE no prontu atu partisipa iha edukasaun sívika sira-ne’ebé CNE realiza iha munisípiu Viqueque. Alende kolaborasaun ba edukasaun sivika no ami mós diskute preparasaun ba eleisaun sira-ne’ebé atu realiza iha Viqueque”, katak nia.
PAM ne’e nota edukasaun sivika nu’udar programa ida ne’ebé importante atubele eduka eleitór sira hodi partisipa iha prosesu eleisaun sira-ne’ebé tuir.
“Ha’u husu eleitór munisípiu Vqueque liuliu eleitór iha suku Builo ne’ebé sei partisipa eleisaun suku iha 27 fulan-Abríl atu partisipa eleisaun hodi ezerse direitu votu,” nia afirma.
Iha fatin hanesan, Prezidente CNE, José Bele, afirma sorumutu ne’e ho objetivu atu hametin lasu kooperasaun ho autoridade hodi kontinua fó konfiansa ba CNE ne’ebé nu’udar órgaun independente.
“Ami mós husu agradese ba Prezidente autoridade munisípiu Viqueque ne’ebé simu ami ho di’ak, tanba tuir mai ita sei iha tan eleisaun munisipál. Tanba ne’e, Eleisaun importante iha nasaun demokrátiku ida-ne’e”, nia agradese.
Tuir kalendáriu, ohin CNE lansa edukasaun sivika iha suku 10 ne’ebé sei realiza eleisaun suku iha loron 27 Abríl.
Notísia relevante: Eleitór 33.176 sei partisipa iha eleisaun suku 27 abril
Jornalista: Vitorino Lopes da Costa
Editór : Florencio Miranda Ximenes
