VIQUEQUE,03 abríl 2024 (TATOLI)-União Nasionál de Pequenas Emprezas (UNAPE-sigla portugés), servisu hamutuk ho CCI-TL no Banku ANZ Timor-Leste, kuarta ne’e, fó ona formasaun ba emprezáriu hosi empreza ki’ik hamutuk 50 kona-ba jestaun akontabilidade no planu negósiu iha munisípiu Viqueque.
Prezidente UNAPE munisípiu Viqueque, Jilberto Ribeiro da Costa, hateten formasaun ne’e ho ninia objetivu maka atu hasa’e koñesimentu emprezáriu sira-nian iha aréa jestaun emprezariál no planu negósiu atu sira bele iha kapasidade atu jere rasik sira-ninia empreza hodi kontribui ba prosesu dezenvolvimentu nasaun nian.
“Ho nune’e Asosiasaun UNAPE nia dever ida maka oinsá hasa’e koñesimentu ita-nia empreza ki’ik, atu kria kondisaun minímu ba empreza ki’ik sira iha munisípiu ida-ne’e, nune’e bele hakbi’it empreza sira-nia ekonómia,”Prezidente UNAPE ne’e, hateten ba jornalista sira iha salaun Institutu Apoiu Dezenvolvimento Emprezariál (IADE), Beloi.
Tuir-nia empreza kiik sira hakarak halo negósiu maibé dezafiu ne’ebé maka sira enfrenta mak oinsá atu halo jestaun ba sira-nia empreza rasik, entaun ho formasaun ida-ne’e, garante katak formadór sira bele kontribui atu oinsá hasa’e koñesimentu emprezáriu sira-nia iha aréa jestaun no planu negósiu ba futuru.
Iha fatin hanesan Prezidente CCI-TL munisípiu Viqueque, Florêncio Armindo da Concieção G. da Costa, hateten formasaun jestaun no planu negósiu ba empreza ki’ik sira-ne’e pertenente atu nune’e empreza sira iha koñesimentu kle’an iha mundu negósiu hodi kompete iha merkadu lokál nasionál no internasionál.
“Ita hatene katak antes hahú negósiu iha koñesimentu, maibé koñesimentu ne’ebé mai loos ba loos. Konesimentu kona-ba jestaun di’ak ne’e ita tenke tuir formasaun sira hanesan daudauk ne’e, atu motiva empreza ki’ik oinsá ba oin ne’e sira bele sai empreza boot,” Nia realsa.
Enkuantu, formasaun ne’e, realiza tanba servisu hamutuk entre UNAPE ho Kámara Komérsiu Indústria Timor Leste (CCI-TL-sigla portugés) munisípiu Viqueque no formadór sira maihosi banku ANZ.
Jornalista : Vitorino Lopes da Costa
Editór : Agapito dos Santos
