COVALIMA, 05 Abríl 2024 (TATOLI) – Administradór Postu Administrativu Zumalai , Alípio Magno, orienta xefe suku sita atu organiza nia populasaun halo limpeza no halo lutu haleu uma atu garante ambiente suku ne’ebé moos.
“Iha ha’u-nia mandatu, ha’u fó prioridade implementa programa ida atu halo limpeza no halo lutu haleu uma, nune’e bele garante ambiénte moos iha suku no aldeia sira”, nia hatetn iha Somo Kanua, ohin.
Alípio Magno esplika razaun populasaun halo lutu haleu uma atu animál sira labele halo sirkula arbiru iha uma oin no iha estrada públiku.
Nia fó hanoin mós ba Komandante Eskuadra Zumalai atu orienta ba Ofisiál Polísia Suku (OPS), xefe suku no aldeia sira atu iha kada sesta-feira halo limpeza hamutuk ho populasaun no husu rezidente sira tenke sulan animál, tanba populasaun iha aldeia Somo Kanua hela besik iha estrada públiku.
“Suku no aldeia ne’ebé nia bairru foer signifika xefe suku no aldeia la fó orientasaun ba nia populasaun atu halo limpeza iha nia hodi garante ambiénte ne’ebé moos”, dehan.
Postu Zumalai, mnisípiu Covalima iha suku ualu mak Faleto, Lepo, Lour, Mape, Ucecai, Raimea, Tashilin no Zulo, ho totál populasaun 10.382 no xefe família 4.649.
Reprezentante Komandante PNTL Covalima, Inspetór Xefe Polísia Gaspar Afonso Soares, esplika katak iha loron sesta funsionáriu iha instituisaun hotu hala’o limpeza no ida-ne’e hanesan programa nasionál, tanba ne’e suku no aldeia tenke matein programa ne’e.
Xefe Suku Raimea, Agostinho Sequeira, admite katak xefe suku sira iha postu Zumalai simu ona orientasaun husi administradór atu orienta populasaun halo lutu haleu uma oin, maibé to’o ohin loron balun seidauk kumpre orientasaun tanba populasaun sei okupadu ho halai natar.
Jornalista: Celestina Teles
Editora: Maria Auxiliadora
