VIQUEQUE, 05 abríl 2024 (TATOLI)-Kondisaun estrada husi suku Builo postu Ossu, liga ba área Edimumu postu Uatulari aat hodi difikulta povu lori produtu lokál bá merkadu.
“Kondisaun estrada iha suku Builo liga ba Edimu ho kilometru 31 ne’e grave tebe-tebes, nune’e difikulta ba abitante sira-nia movimetu. Iha tinan kotuk husi Institutu Jestaun Ekipamentu, Instituto Públiku (IJE,I.P) loke ona dalan husi Builo liga ba Edimumu. Maibé, dalan ne’ebé IJE loke laiha baleta no ponte nune’e tempu udan estrada aat tanba bee mak estraga hotu”, Xefe suku Builo, Osorio da Silva, hateten ba Agência TATOLI,I.P, iha postu Viqueque Vila, ohin.
Ho kondisaun ne’e, Autoridade lokál ne’e husu Ministériu relevante hodi loke konkursu ba empreza sira hodi hadi’a dalan husi Builo liga ba Edimumu atu povu lori sa’e sira-nia produtu bá merkadu.
Iha fatin ketak, reprezentante Veteranu Builo, Tomas da Silva, haktuir Timor Leste hetan ona independénsia, maibé povu hela iha área rurál seidauk sente infraestrura liuliu estrada ne’ebé liga ba suku no aldeia sira.
“Tanba ne’e nu’udar veteranu ami hakarak fó hanoin nafatin ba Governu hodi tau matan ba ami-nia dalan ne’ebé IJE loke iha tinan kotuk, agora povu labele asesu ho tranporte nune’e difikulta povu atu lori sai sira-nia produtu lokál ne’ebé povu kuda”, Veteranu ne’e sujere.
Suku Builo kompostu husi aldeia haat hanesan Builo, Buareka, Lutugia no Buarulu ho totál populasaun 1.456, suku ne’e rasik lokaliza iha área rurál ne’ebé daudauk asesu ona ba ahi eletrisidade no bee-moos.
Notísia relevante:Konstrusaun sede suku Builo atinje ona 92%
Jornalista : Vitorino Lopes da Costa
Editór : Florencio Miranda Ximenes
