VIQUEQUE, 05 abríl 2024 (TATOLI)- Koordenadór Bee Timor Leste, Empreza Públiku (BTL,E.P) munisípiu Viqueque, Marito da Costa, relata trismestre dahuluk husi Janeiru to’o Marsu 2024, konsege rekolla reseita $4.377.55 ba kofre Estadu.
“Iha fulan tolu dahuluk ida-ne’e, ami kolleta reseita husi abitante sira-ne’e utiliza ona metru kontadór iha kapitál Viqueque no seluta taxa ho totál hamutuk $.4.377,55 no reseita sira-ne’e ami fornese ona ba kofre Estadu”, Marito da Costa, hateten ba Agência TATOLI,I.P, iha ninia kna’ar fatin Beloi, ohin.
Daudaun, uma-kain 394 mak utiliza metru kontadór , befesiariu ba bee-moos hamutuk 427 husi númeru ne’e uma-ka’in 33 mak seidauk monta kontadór, maibé kada fulan sira kumpre selu taxa $5 .
“Maske, uma-kain balun seidauk monta kontadór, maibé sira asesu ba bee-moos ne’ebé BTL,E.P fornese. Nune’e sira selu la liuhusi kontadór ne’ebé iha, ami fó tarefa estadar ba abitante uma-kain 33 kada fulan uma-kain ida selu kustu tarefa $5 dolar”, katak.
Kona-ba melloramentu sistema bee-moos iha sidade Viqueque Vila, mak BTL,E.P kontinua hadi’ak ba kanu transmisaun, kanu distribuisaun, kanu ligasaun bá uma no monta metru kontadór ba zona Beloi.
Metru kontadór BTL,E.P Viqueque hahú husi 2021, 2022, 2023 to’o 2024 agora instala ona unidade 394.
Tuir dadús reseita husi kada tinan ne’ebé BTL, EP munisípiu Viqueque rekola iha tinan 2022 konsege hatama reseita hamutuk $7.970, 90, iha tinan 2023 rekolla reseita ba kofre estadu $21.39.10 no trimestre dahuluk husi tinan 2024 $4.377,55, ho totál reseita BTL,E.P kobre ona hamutuk $33.487,55.
Aleinde ne’e, nia dehan, tékniku operadór BTL,E.P daudaun halo espansaun ba metru kontadór iha munisípiu Viqueque liuliu monta ba uma-kain sira hanesan área Lamak-Laran no área Kabira-Oan.
Dezafiu ne’ebé BTL,E.P enfrenta, nia dehan, antes empreza hahú funsionáriu administrasaun no tékniku operadór BTL,E.P hamutuk na’in-14, maibé daudaun funsionáriu na’in-haat deside sai husi funsionáriu, nune’e ativa hela na’in-10.
“Ami hasoru ne’e menus rekursu umanu. Ho menus rekursu ha’u aprezenta ona ba ezekutivu BTL,E.P atu reforsa rekursu, nune’e foin lalais empreza BTL, E.P hahú loke ona konkursu ba pozisaun operadór ba munisípiu Viqueque hamutuk na’in-lima no husi na’in-lima ne’e ha’u sente reforsa ona ami-nia servisu ba instasaun metru kontadór ba uma-kain sira”, nia afirma.
Jornalista :Vitorino Lopes da Costa
Editór : Florencio Miranda Ximenes
