DILI, 05 abríl 2024 (TATOLI) – Diretora Nasionál Transporte Terrestre (DNTT), Maria Antónia, husu ba motorista sira atu hakbesik aan ba edifísiu DNTT Balide atu foti xapa matríkula orijinál.
“To’o agora ita-nia motorista sira balun seidauk hakbesik aan mai iha edifísiu DNTT atu foti xapa matríkula orijinál hodi monta iha ita-bo’ot sira-nia motorizada no karreta. Tanba dala barak liu motór ita haree barak maibé seiduk monta xapa matríkula orijinál. Xapa matríkula ne’e DNTT prepara ne’e sufisiente hela, soké na’in mak lakohi mai foti, kuandu tama ba auto-stop mak polísia foin haruka sira mai foti iha ne’e”, Maria Antónia hateten ba TATOLI iha kna’ar fatin Balide.
Maria Antónia hateten, DNTT kontrata Empreza Auto Zone iha 2023 hodi halo akizisaun ba xapa matríkula ba motór hamutuk 30.000 ho kustu $270.000, enkuantu ba xapa matríkula karreta hamutuk 7.000 ho kustu $77.000.
“Ba xapa matríkula motór nian agora ita to’o ona iha xapa ho letra X, xapa matríkula ida-ne’e iha ona no karreta ho xapa matríkula A.15.500 ne’e nia orijinál mós iha, inklui xapa matríkula karreta ho marka B.15. 499 mós nia orijinál iha hela soké na’in sira mak seidauk mai foti iha DNTT, tanba ne’e mak ha’u dehan xapa matríkula ba motór no karreta ne’e sufisiente hela”, nia subliña.
Diretora DNTT ne’e promote katak Diresaun Nasionál Transporte Terrestre, tinan oin, sei tau iha planu orsamentu hodi kontinua tau prioridade ba produsaun xapa matríkula orijinál ba motór no karreta, tanba nesesidade duni atu tau konsiderasaun.
Jornalista: Natalino Costa
Editór : Zezito Silva
