DILI, 04 abríl 2024 (TATOLI)—Diretór Nasionál Formasaun Dosente no Professionál Edukasaun (INFORDEPE), Marçal Martins, hateten iha trimestre dahuluk hahú hosi janeiru to’o marsu ne’e, INFORDEPE ezekuta ona Orsamentu Jerál Estadu (OJE) 2024 ne’ebé foin atinje 18.8%.
“Hosi pursentu ne’e ita ezekuta ona $60.000-resin,” Diretór Marçal hateten ba Agência Tatoli, iha nia kna’ar fatin, Vila Verde, kinta ne’e.
Hosi orsamentu ne’e ezekuta ba programa no atividade sira hanesan fó formasaun no palestra, saláriu no vensiementu, kustu dezlokasaun hosi munisípiu mai nasionál no nasionál ba munisípiu, inklui materiál eskritóriu nian, bens servisu mak ezekuta to’o ona 18.8%.
Nia dehan, hosi restante orsamentu ne’e sei kontinua ezekuta iha trimestre daruak nian, nune’e semana oin hahú ona formasaun ba profesór pre-eskolár to’o sekundáriu jerál no tékniku vokasionál no mós formasaun ba profesór ensinu sekundáriu tékniku vokasionál iha munisípiu Ermera, Dili, Viqueque no Covalima.
“Fomasaun ne’ebé ita prepara mak fízika, kímika, biolojia, artístika. Ba pre-eskolár nian mak literásia no numerásia. Liuhusi informasaun ne’e sei fasilita no hasa’e konesimentu profesór sira-nian, hodi prátika iha eskola,” nia dehan.
Kona-ba kapital menór, pedidu hotu-hotu iha ona Ministra Edukasaun nia fatin, hein aprova no implementa formasaun sira hosi nível eskolaridade hahú hosi pre-eskolár to’o nível sekundáriu jerál no tékniku vokasionál.
Tanba ne’e, iha ezame primeiru períodu ne’e remata samana ne’e, sei avansa ho formasaun durante semana ida ba profesór sira hosi nível eskolaridade sira.
Orsamentu ne’ebé alokadu ba INFORDEPE iha OJE tinan 2024 nian ne´e ho totál hamutuk $1.199.911.
Jornalista : Osória Marques
Editór : Cancio Xiemenes
