iklan

POLÍTIKA

Pás iha sosiedade hahú husi edukasaun família

Pás iha sosiedade hahú husi edukasaun família

Uma Fukun Parlamentu Nasionál,Imajen Egas Cristovão

DILI, 05 abril 2024 (TATOLI)–Membru Parlamentu Nasionál (PN) liuhusi Deputadu Antoninho Doutel Sarmento, hateten pás iha sosiedade ne´e primeiru mak hahú husi baze mak edukasaun família ba oan sira iha idade sei joven, tanba ikus-ikus ne´e kazu aumenta ne’ebé envolve husi joven sira.

“Konflitu sira-ne’e akontese, ninia baze mak família. Primeiru ita tenke fó uluk baze mak família mak tenke iha kbiit edukasaun ida mak diágolu nakloke iha família ho oan sira, liuliu sira-ne’ebé mak idade joven ne’e tenke iha diálogu permanente entre família inan-aman ho oan sira, hodi fó espasu ba sira dalan ne’ebé mak di’ak liu kontribui ba moris ida iha feliz, dame iha família depois sai ba sosiedade,” nia hateten ba Agência Tatoli iha uma fukun PN.

No daruak parte edukasaun formal sira mós presiza atu fó edukasaun liliu iha nível moral, étika, tanba buat rua ne’e tenke fó karáter pozetivu ba foinsa’e sira.

Alíende nível  formasaun informal hanesan sentru formasaun tenke fó espasu kondisaun atu fó formasaun iha fatin sira ne’eba, no bainhira iha ona formasaun sira ne’e hotu Governu pelumenus tau kondisaun mínimu ho di’ak ba to’o munisípiu hotu hodi fó espasu ba joven sira atu apriende barak.

Deputadu husi membru Komisaun D trata asuntu Ekonomia no Dezenvolvimentu iha PN ne’e, mós husu Governu atu kria kampu servisu ba joven sira-ne’e importante.

“Aleinde haruka joven ba rai-li’ur buka servisu iha ne’eba, maibé oinsá mós atu loke kampu traballu iha rai-laran rasik. Tanba, bainhira ita kria ona kondisaun ba joven sira servisu, mak joven sei laiha tempu atu halo problema, ” Deputadu FRETILIN ne’e hateten.

Antes ne’e, iha reuniaun plenária PN, Deputadu CNRT, Natalino dos Santos, apela ba joven timoroan hotu atu kontribui ba pás no estabilidade iha rai-laran, hodi bele hamutuk lori dezenvolvimentu nasaun ba oin.

Deputadu KHUNTO, António Ferreira, preokupa kestaun seguransa iha kapitál Dili, ema akompaña iha semana ida-ne’e nia laran kuaze konflitu iha fatin-fatin ne’ebé mak rezulta joven barak kanek, no uma ho motor hetan estragu husi akontesimentu ida-ne’e.

“Ho akontesimentu hirak ne’e, kestiona tebes tanbasá mak joven sira sempre hamosu konflitu iha kapitál Dili, ezemplu kazu asaltu malu iha Aimutin. Ne’eduni husu ba Governu liuhusi ministériu relevante presiza haree didi’ak kona-ba akontesimentu ida-ne’e no presiza halo investigasaun kle[an hodi solusiona,” nia dehan.

Jornalista : Nelson de Sousa

Editór      : Cancio Ximenes  

iklan
iklan

Leave a Reply

iklan
error: Content is protected !!