Membru F-FDTL 30 tuir formasaun primeiru sokoru
DILI, 08 abríl 2024 (TATOLI) – Membru FALINTIL-Forsa Defeza Timor-Leste (F-FDTL) hamutuk 30 tuir formasaun ba primeira sokoru ho objetivu atu fó asisténsia ba membru F-FDTL sira ne’ebé iha servisu fatin inklui ba komunidade sira ne’ebé presiza hetan asisténsia iha fatin públiku.
Formasaun ne’e la’o durante semana ida nia-laran, hahú hosi segunda (8/4) to’o sesta (12/4). Partisipante sira mai hosi membru F-FDTL, hosi Komponente Terrestre, Komponente Navál no Komponente Aero Lijeria, Unidade Polísia Militár (PM), Sentru Instrusaun Komandante Nicolau Lobato (CICNL, sigla portugés), Unidade Apoia Servisu (CAS) no Unidade Falintil.
Portavós Komandu F-FDTL, Kapitão Mar e Gerra, João Silva, reprezenta Xefe Estadu Maiór Jenerál F-FDTL nia naran loke formasaun ida ne’ebé realiza iha Institutu Nasionál Saúde Públika (INSP).
“Ohin halo abertura ba formasaun primeiru sokoru, tanba primeiru sokoru importante atu bele salva maluk sira seluk ninian vida, treinamentu primeiru sokoru ida-ne’e sei partisipa hosi ita-nia militár sira oinsá atu kapasita sira hodi bele asegura membru sira seluk bainhira hetan atakasaun imediata”, Kapitão Mar e Gerra, João Silva, ba jornalista sira hafoin abertura ba formasaun iha Institutu Saúde Públika (INSP) Comoro, Segunda, ohin.
Iha fatin hanesan, Diretór Institutu Saúde Públika (INSP), Frederico Bosco Alves dos Santos, dehan iha formasaun ne’e, Ministeriu Saúde liuhosi Institutu Nasionál Saúde Públika mak responsabliza ba área kapasitasaun hosi Doutór sira hosi Hospitál Nasionál Guidu Valadares (HNGV). Atividade ne’e fahe ba nivel tolu mak báziku, intermediáriu no avansadu.
“Ita iha kapasidade atu fó formasaun ida-ne’e. Materia ba formasaun ne’e espesífiku ba kuidadu báziku liuliu hanesan ema ruma hetan asidente ou ema ruma hetan kardiaku oinsá ita atu fó asisténsia primeiru sokoru inklui bainhira ita-nia sidadaun sira ne’ebé envolve iha asidente bainhira nia kanek karik saida mak ita halo atu fó asisténsia imediatu ba nia, materia sira ne’e mak ita sei foka iha forsamasaun ne’e”nia konklui.
Jornalista: Natalino Costa
Editór : Zezito Silva
