DILI, 08 abríl 2024 (TATOLI)—Parlamentu Nasionál (PN), segunda ne’e, liuhusi reuniaun plenária aprova pedidu autorizasaun asentimentu dezlokasaun vizita ofisiál husi Prezidente Repúblika (PR), José Ramos Horta, ba Portugál ho Estadu Unidu Amérika (EUA) ho votu a-favór 42, kontra ida (1) no abstensaun neen (6).
“Ne’ebé, pedidu husi Prezidente Repúblika pasa, ” Prezidente Parlamentu Nasionál, Maria Fernanda Lay, hateten iha sala plenária.
Tuir pedidu karta husi Xefe Estadu, José Ramos Horta, nia dezlokasaun ofisiál resposta konvite husi Prezidente Portugál hodi partisipa iha tinan 50 aniversáriu Revolasaun Ai-funan iha 25 abríl 1974, ne’ebé PR Horta sei dezloka entre iha loron 20 no 28 abríl 2024.
PR Horta informa mós katak konvidadu sira-ne´ebé partisipa serimónia solene 15 abríl iha Lisboa mak eis Prezidente Repúblika, Taur Matan Ruak ho Eis Xefe Estadu Maiór F-FDTL, Tenente Jenerál, Lere Anan Timur.
PR mós informa ba membru Parlamentu katak, iha loron 28 fulan Abríl 2024 kontinua viajen husi Lisboa ba Estadu Unidu Amérika (EUA) tanba hetan konvite husi Prezidente ST University nu’udar konvidadu onra no oradór prinsipál iha serimónia graduasaun prestijiada Universidade ne’ebé sei realiza iha loron 29 abríl, no sei fila-fali iha 30 abríl no to’o Timor-Leste iha 02 maiu 2024.
Enkuantu Parlamentu Nasionál tuir termu númeru 1 artigu 80 no alínea h) númeru 3 artigu 95 konstituisaun fó asentimentu deslokasaun Prezidente Repúblika.
Jornalista : Nelson de Sousa
Editór : Cancio Ximenes
