COVALIMA, 08 Abríl 2024 (TATOLI) – Komando Polísia Nasionál Timor-Leste (PNTL) Covalima simu ona orientasaun hodi suspende atividade jogu bola guling, tuir rezolusaun Governu númeru 14/2024, 20 Marsu.
“Ita tenke orienta ba komunidade sira atu hein uitoan bainhira Estadu fó lisensa. Agora, fó hatene ona ba sidadaun sira ne’ebé loke jogu bola guling atu taka. Tanba ne’e, kalan-kalan ami tenke halo vijilánsia”, Komandante PNTL, Superintendente Polísia Calisto Gonzaga, dehan iha Santa Rosa, ohin.
Nia dehan rezolusaun Governu haruka taka ona jogu bola guling, maibé iha eskuadra Polísia sira difísil atu kontrola tanba rede ladún di’ak, maibé hanesan komandu nafatin fó hanoin ba sidadaun ne’ebé hala’o atividade jogu tradisionál bola guling hodi para.
“Ita hanesan sidadaun tenke kumpri rezolusaun ne’ebé Governu fó sai mai husi Ministériu Turizmu hodi hein orientasaun tuirmai. Hothotu iha vontade atu kumpri”, nia dehan.
Tuir rezolusaun Governu, suspensaun jogu ne’e halo tanba aumentu kriminalidade husi atividade referida maka iha nesesidade atu promove seguransa ba populasaun hotu.
Iha Covalima atividade hodi jogu bola guling hala’o iha Bairru Legore, Mata-air no Cendana Satu, iha postu Suai. Aleinde taka bola guling, Komandu mós haree dokumentu jogu sira-nia lisensa ne’ebé sei validu hanesan kazinu no lotaria sira.
Prezidente Autoridade Munisípiu Covalima, Miguel Armada Cardoso, mós simu ona despaixu husi nasionál atu taka jogu tradisionál bola guling, kuru-kuru, joga karta no seluk tan.
“Loke jogu ne’e hamosu problema hanesan na’ok-teen barak no halo ema baruk atu halo serbisu no família uma-laran baku malu tanba feto sira mós joga bingo no seluk tan”, nia realsa.
Jornalista: Celestina Teles
Editora: Maria Auxiliadora
