iklan

KOVALIMA, HEADLINE

Tékniku jurídiku elabora ezbosu Lei Tara Bandu hodi implementa iha Covalima

Tékniku jurídiku elabora ezbosu Lei Tara Bandu hodi implementa iha Covalima

Prezidente Autoridade Munisípiu Covalima, Miguel Armada Cardoso. Imajen/Celestina Teles.

COVALIMA, 08 Abríl 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, fó ona orientasaun ba tékniku jurídiku sira atu elabora ezbosu lei Tara Bandu hodi implementa iha munisípiu ne’e.

“Lei Tara Bandu ne’e hafoin finaliza elaborasaun, PAM ho nia estrutura sei dezloka bá kada postu [administrativu] atu halo sensibilizasaun molok implementa planu ne’ebé PAM mehi”, Miguel Cardoso informa, ohin.

Razaun PAM hakarak implementa tara bandu iha posta sira, tanba komunidade ladún iha konxiénsia hodi estraga sasán no autoridade ladén forte halo jestaun di’ak, nune’e presiza atu reforsa implementasaun lei ne’e hodi aplika sansaun ne’ebé adekuada.

Lidér  munisípiu ne’e dehan atu implementa lei ne’e, veteranu no sosiedade tenke apoia masíma tanba lei referida fó kompeténsia tomak ba xefe suku sira, liuhusi reuniaun konsellu suku.

“Sansaun ne’ebé sei aplika ba ema mak selu multa no mós bele bá prizaun. Ita agora hetan desentralizasaun administrativa, finanseira no patrimoniál la’o loos hela bazeia ba lei númeru 9/2016, iha artigu 21, hodi ko’alia kona-ba kompeténsia ba xefe suku”, realsa.

Administradór postu Maucatar, Laurentino de Jesus, salienta katak polítika PAM Covalima nian hetan apoiu husi administradór postu sira hodi reforsa Lei Tara Bandu ne’e.

“Antes ne’e, organizasaun naun-governamentál halo ona tara bandu no kuaze implementa iha suku Ogues, Matai,  Belacasak no Holpilat. Ho polítika PAM nian, ita kontinua hametin de’it oinsá atu haree ba regra tara bandu”, nia relembra.

mplementa Lei Tara Bandu iha postu sira ne’e oinsá atu regula populasaun sira labele halo tuir sira-nia hakarak hodi ta’a ai ne’ebé kauza ba estraga ambiente, sunu rai no seluk tan.

Rekorde katak, iha tomada pose ba prezidente foun autoridade Covalima, ne’ebé realiza iha marsu,  Miguel Cardoso, kompromete hakarak prioriza programa haat durante nia mandatu ba períodu 2024-2028.

Programa haat ne’e mak hametin kultura liuhusi tara bandu iha suku ida-idak ba revolusaun mentál hodi kria estabilidade, hametin amizade no konfiansa ba malu; funsiona serbisu estensionista iha suku hodi fó apoiu ba agrikultór sira; kontinua hatutan implementasaun programa Suai Suplay Base; no kontinua hadi’ak serbisu eis-administradór Covalima.

Kovalima iha postu administrativu Fatululik, Fatumea, Fohorem, Tilomar, Maucatar, Suai no Zumalai ho nia totál populasaun hamutuk rihun 73.909, tuir Sensu Uma-Kain 2022.

Notísia relevante: Regra foun rua iha rituál tara bandu iha Tilomar

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!