COVALIMA, 09 abríl 2024 (TATOLI)-Administradór Postu Administrativu Maucatar, munisípiu Covalima, Laurentino de Jejus, husu ba ninia populasaun sira atu kontribui hodi kuda ai-oan barak liután iha tempu udan nune’e bele prevene aan hosi dezastre naturál hanesan rai monu.
“Ami identifika fatin ne’ebé risku ba dezastre naturál nune’e ha’u sei ko’alia ho Floresta Covalima atu prepara ai-oan, nune’e ita bele kuda atu prevene dezastre naturál,” nia hateten ba TATOLI, iha Sukaer-Laran, tersa ne’e.
Nia relata tuir jeografikamente kada tinan-tinan suku Ogues, Matai, Belekesak no Holpilat ne’ebé partensia iha postu administrativu Maucatar nian risku ba dezastre naturál, tanba ne’e aproveita tempu udan, komunidade sira persiza organiza malu atu kuda ai-oan iha rai abandonadu no mós fatin sira ne’ebé risku ba dezastre naturál.
Iha parte seluk, Diretór Servisu Protesaun Sivil no dezastre Naturál munisípiu Covalima, João Martins, dehan ninia parte daudaun ne’e preparadu atu responde ba situasaun emerjénsia ruma bainhira akontese dezastre naturál iha munisípiu Covalima.
“Ami-nia preparasaun atu halo prevensaun ba fatin sira ne’ebé risku ba dezastre ba naturál mak hodi fó treinamentu liuliu ba pesoál suku oinsá atu hasa’e sira-nia koñesimentu atu responde ba situasaun emerjénsia,” nia hateten.
Kona-ba estoke apoiu emerjénsia sira ne’ebé oras ne’e rai iha armajén servisu protesaun munisípiu Covalima nian, nia relata foos saka 100-resin, supermi kaixa 100-resin, no mós materiál sira seluk hodi responde ba vitima dezastre naturál bainhira akontese situasaun emerjénsia durante tinan 2024.
Tuir dadus 2023 nian ne’ebé publika husi servisu Autoridade Protesaun Sivíl Covalima rejista vítima dezastre naturál ne’ebé akontese iha tinan kotuk hamutuk-139, no hosi númeru ne’e família uma-kain hitu sofre problema rai-halai, kazu inséndiu haat, anin sobu uma hamutuk 128.
Hosi totál vitima dezastre 139 ne’ebé akontese iha 2023 liubá, uma ne’ebé tama iha kategoria estragus totál hamutuk 47, estragus naton iha 24 no estragus kmaan hamutuk 67, enkuantu vitíma hirak ne’e hetan ona apoiu rekuperasaun no materiál konstrusaun hosi Governu.
No iha tinan 2024 ne’e hahú hosi fulan- janeiru to’o fevereiru, APC munisípiu Covalima, rejista Covalima rejista kazu inundasaun bee tama komunidade nia uma no anin sobu uma hamutuk 88, prosesu verifikasaun ramata ona no oras ne’e haruka ona lista ne’e ba servsiu nasionál hodi hetan apoiu materiál konstrusaun, maibé uma ka’in 10 hetan deit apoiu emerjénsia tanba hetan estragus kmaan.
Jornalista: Celestina Teles
Editór: Agapito dos Santos
