DILI, 09 Abríl 2024 (TATOLI) – Diresaun Nasionál Kuarentena no Biosseguransa halo ona destruisaun ba na’an importadu ho kuantidade kilograma 36,21 tanba laiha dokumentu legál.
Diretór Nasionál Kuarentena no Biosseguransa, Manuel da Costa, hateten na’an sira ne’e mai husi Xina, Kamboja, Filipina, Singapura, Vietname no Indonézia hanesan na’an-fahi iha koligrama (kg) 17,25, manu 2,49kg, sourisu 8,6kg, no ikan 7,87kg.
“Ita halo intervensaun ne’e tanba hakarak fó hanoin ba maluk sira ne’ebé importa hahán atu kumpre mós Lei Kuarentena nian, nune’e, bainhira fa’an iha loja sira mós ita bele garante ninia ijiene”, Manuel da Costa dehan ba Tatoli iha Aeroportu Internasionál Nicolau Lobato, Comoro.
Responsavel ne’e salienta katak sasán sira ne’ebé maka tama ka sai husi territóriu ne’e tenke iha dokumentu hanesan sertifikadu, nune’e labele hetan apreensaun husi autoridade sira, tanba Kuarentena iha papél atu tau-matan ba prosesu tama no sai sasán sira husi rai-laran no li’ur hodi prevene no proteje nasaun husi risku sira agrikultura nian, liuliu ba ema nia vida iha país inklui rai seluk.
“Ita-nia maluk sira husi nasaun sira ne’ebé ita mensiona ne’e hatama de’it na’an-manu, sourisu no ikan mai ita-nia nasaun, maibé sira laiha dokumentu ida atu garante katak hahán sira ne’e kualidade no konsidera iha duni ijiene, entaun ita apreende hodi halo prosesu”, nia akresenta.
Na’an sira ne’e Kuarentena halo apreensaun iha aeroportu Dili iha 17 Janeiru to’o 19 Marsu no halo ona destruisaun iha 27 Marsu.
Jornalista: Tomé Amado
Editora: Maria Auxiliadora
