Top

Membru PN husu MAKLN fó atensaun ba veteranu kondisaun defisiénsia mentál

Komunidade lokál no veteranu sira partisipa iha komemorasaun restaurasaun independénsia ba da-XX, iha suku Afaloikai, sesta (20/05). Imajen Tatoli/Vitorino Lopes da Costa'

DILI, 08 abríl 2024 (TATOLI)—Membru Parlamentu Nasionál (PN) liuhusi Deputadu bankada Partidu Libertasaun Populár (PLP), Helder Freitas ‘Kamarudi’, husu Ministériu ba asuntu Kombatente Libertasaun Nasionál (MAKLN) atu fó atensaun ba veteranu balun ne’ebé  ho kondisaun defisiénsia mentál iha suku Cairui, postu administrativu Laleia, munisípiu Manatuto.

“Tanba iha fiskalizasaun ne’ebé komisaun F trata asuntu saúde hala’o iha munisípiu Manatuto, postu administrativu Laleia, suku Cairui, ami ba vizita duni veteranu balun ne’ebé ho kondisaun defisiénsia mentál, oinsá ita dignifika no valoriza veteranu sira-nia kontribuisaun iha luta ba libertasaun nasionál,” nia levanta liuhusi reuniaun plenária PN, segunda ne’e.

Ho nune’e, nia rekomenda ba Ministériu Asuntu Kombatente Libertasaun Nasionál (MAKLN) atu akompaña veteranu sira-ne’ebé hetan moras mentál hodi bele hetan tratamentu ho dignu.

Tanba veteranu balun ho hela situasaun ne’ebé hasoru, nune’e ministériu atu kria kondisaun ruma hodi halibur no kontinua akompañia sira-ne’ebé hetan moras, tanba iha tempu luta libertasaun sira fó aan tomak ba rai ida-ne’e, maibé ohin loron la hetan atensaun ho di’ak liuliu  ne’ebé hetan moras.

Iha parte seluk, Deputadu FRETILIN, Antoninho Doutel Sarmento, husu ba MAKLN atu tau atensaun ba fatin desteradu Ataúro ne’ebé harii monumentu iha ne’eba, tanba fatin ne’e istóriku tebes ne’ebé mundu internasionál hatene.

Nune’e, tuir nia, presiza hanoin ona haree fila-fali hodi bele konsidera monumentu ne’e ho dignidade, reprezenta duni ema 7000 ninia sofrimentu iha fatin ne’eba, tenke iha dezenvolvimentu integradu hodi fasilita dada ema atu ba fó omenajen no sai fatin turizmu ne’ebé di’ak.

Deputadu Adolfo Martins levanta kestaun kona-ba restu mortál iha munisípiu Ermera ne’ebé rekolla iha tinan 2015, maibé to’o agora restu mortál sira-ne’e hotu seidauk haloot kuaze besik 600 tau iha ossoáriu kiik ida iha ne’eba no kaisaun sira-ne’e hada hanesan sasán ita ba loza haree ema faan sasán.

Iha tinan hirak ba kotuk, Governu halo tiha ona monumentu foun ida iha munisípiu Ermera, postu Railaco suku Fatukero.

“Monumentu ne’e moru halaeu tiha hotu ona no iha portaun, maibé monumentu ne’e agora abandona duut mak moris iha laran boot liu tiha fali moru, laiha kontinuasaun atu lori ita-nia restu moratál hodi haloot iha ne’eba ho dignu,” nia dehan.

Vise Ministru ba Asuntu Parlamentár, Adérito Hugo da Costa, rejista prekupasaun Deputadu sira-nian ne´e no sei enkamiña ba ministériu tutela hodi fó atensaun.

Jornalista : Nelson de Sousa

Editór         : Cancio Ximenes   

Publisidade

Leave a Reply

Latest Post

error: Content is protected !!